naz bhala kis baat ka tujhko pas-e-hunar jab kuchh bhi nahin

naaz bhalā kis baat kā tujh ko pās-e-hunar jab kuchh bhī nahīñ

manzil par pahuñchegā kaise raḳht-e-safar jab kuchh bhī nahīñ

dekh bhaTak jaa.e na musāfir aañkh kī bhūl-bhulaiyyā meñ

kis ko DhūñDe shoḳh-nazar tā-hadd-e-nazar jab kuchh bhī nahīñ

merī nigāhoñ meñ duniyā kī har shai se nāyāb hai tū

aur kisī ko kyuuñ chāhūñ tujh se behtar jab kuchh bhī nahīñ

maiñ bhī faanī tū bhī faanī saarā 'ālam faanī hai

kyā ḳhadd-o-ḳhāl pe naaz kareñ duniyā meñ amar jab kuchh nahīñ

jugnū aur sitāre mil kar tujh ko kyā lalkāreñge

tere aage nuur ke paikar shams-o-qamar jab kuchh bhī nahīñ

bātil ko ab kaun duhā.ī qānūn aur insāf kī de

bandoñ kā kyā ḳhauf use allāh kā Dar jab kuchh bhī nahīñ

tāj-mahal phīkā lagtā hai us ke ruup ke aage 'shād'

terī kyā auqāt bhalā sañg-e-marmar jab kuchh bhī nahīñ

naz bhala kis baat ka tujh ko pas-e-hunar jab kuchh bhi nahin

manzil par pahunchega kaise raKHt-e-safar jab kuchh bhi nahin

dekh bhaTak jae na musafir aankh ki bhul-bhulaiyya mein

kis ko DhunDe shoKH-nazar ta-hadd-e-nazar jab kuchh bhi nahin

meri nigahon mein duniya ki har shai se nayab hai tu

aur kisi ko kyun chahun tujh se behtar jab kuchh bhi nahin

main bhi fani tu bhi fani sara 'alam fani hai

kya KHadd-o-KHal pe naz karen duniya mein amar jab kuchh nahin

jugnu aur sitare mil kar tujh ko kya lalkarenge

tere aage nur ke paikar shams-o-qamar jab kuchh bhi nahin

baatil ko ab kaun duhai qanun aur insaf ki de

bandon ka kya KHauf use allah ka Dar jab kuchh bhi nahin

taj-mahal phika lagta hai us ke rup ke aage 'shad'

teri kya auqat bhala sang-e-marmar jab kuchh bhi nahin