naz ghaflat ke uThata hun main hushyari mein

naaz ġhaflat ke uThātā huuñ maiñ hushyārī meñ

ālam-e-ḳhvāb hai goyā mirī bedārī meñ

kaun aatā hai ilāhī ki pā-e-istiqbāl

hasrateñ der se masrūf haiñ tayyārī meñ

kyā banā leñge shab-e-hijr bigaḌ kar naale

dard uTh baiThe agar dil kī taraf-dārī meñ

hosh uḌ jaate haiñ pāband-e-qafas kar ke mujhe

hai mire saath rihā.ī bhī giraftārī meñ

le liyā dil mirā ġhussa se jhiḌak kar us ne

dilrubā.ī bhī hai zālim kī dil-āzārī meñ

jaag kar bhī rahe pāband-e-taġhāful barsoñ

kyā tamāsha hai ki sote rahe bedārī meñ

kyoñ na nākāmī-e-qismat ko duā duuñ 'taufīq'

barsoñ paalā hai mujhe dāman-e-ġham-ḳhvārī meñ

naz ghaflat ke uThata hun main hushyari mein

aalam-e-KHwab hai goya meri bedari mein

kaun aata hai ilahi ki pa-e-istiqbaal

hasraten der se masruf hain tayyari mein

kya bana lenge shab-e-hijr bigaD kar nale

dard uTh baiThe agar dil ki taraf-dari mein

hosh uD jate hain paband-e-qafas kar ke mujhe

hai mere sath rihai bhi giraftari mein

le liya dil mera ghussa se jhiDak kar us ne

dilrubai bhi hai zalim ki dil-azari mein

jag kar bhi rahe paband-e-taghaful barson

kya tamasha hai ki sote rahe bedari mein

kyon na nakaami-e-qismat ko dua dun 'taufiq'

barson pala hai mujhe daman-e-gham-KHwari mein