nazuk hai dil-e-yar na ho gham ki KHabar kash

nāzuk hai dil-e-yār na ho ġham kī ḳhabar kaash

naala mire dil meñ phire mahrūm-e-asar kaash

maiñ yaad meñ us kī dī-o-fardā ko na jānūñ

ye umr-e-do-roza yūñhī ho jaa.e basar kaash

nuqsān-e-dil-o-jāñ hai to raazī huuñ maiñ is par

kuchh aur mohabbat meñ na ho ḳhauf-o-ḳhatar kaash

ham dahr meñ har ek bad-o-nek se milte

lekin tire milne se kiye jaate hazar kaash

ushshāq ke nāloñ se jigar hote haiñ TukḌe

hamdam kisī be-dil kā na ho murġh-e-sahar kaash

ham qālib-e-ḳhākī ko liye phirte haiñ kab se

gir jaa.e kahīñ dosh se ye bār-e-safar kaash

betāb hai paiham kahīñ tīroñ se chhide ye

dil bā.is-e-āzār hai is kā ho zarar kaash

dikhlā.ūñ hujūm-e-ġham asīrān-e-vafā ko

de de koī ham-sāya-e-zindāñ mujhe ghar kaash

dil valvala-e-shauq kā anjām to jaane

dekheñ vo taġhāful se idhar ek nazar kaash

atvār zamāne ke badal jaate haiñ āḳhir

kuchh din ke liye ishq bhī ho jaa.e hunar kaash

is fitna-e-āfāq ko kyoñ dekhne nikle

rusvā-e-jahāñ hote na yuuñ shams-o-qamar kaash

maiñ ahd-e-javānī meñ falak martaba hotā

bār-e-ġham-e-ulfat se nigūñ hotī kamar kaash

be-dard nahīñ girya mirā vo bhī to jāneñ

ashkoñ meñ chalā aa.e koī laḳht-e-jigar kaash

mujh be-sar-o-pā ḳhāk-nashīñ ko bhī mile daad

ai bekasī-e-shauq vo aa jaa.eñ idhar kaash

be-minnat-e-darbāñ hai mujhe hasrat-e-dīdār

mahmil kā uḌe parda sar-e-rāhguzar kaash

nazuk hai dil-e-yar na ho gham ki KHabar kash

nala mere dil mein phire mahrum-e-asar kash

main yaad mein us ki di-o-farda ko na jaanun

ye umr-e-do-roza yunhi ho jae basar kash

nuqsan-e-dil-o-jaan hai to raazi hun main is par

kuchh aur mohabbat mein na ho KHauf-o-KHatar kash

hum dahr mein har ek bad-o-nek se milte

lekin tere milne se kiye jate hazar kash

ushshaq ke nalon se jigar hote hain TukDe

hamdam kisi be-dil ka na ho murgh-e-sahar kash

hum qalib-e-KHaki ko liye phirte hain kab se

gir jae kahin dosh se ye bar-e-safar kash

betab hai paiham kahin tiron se chhide ye

dil bais-e-azar hai is ka ho zarar kash

dikhlaun hujum-e-gham asiran-e-wafa ko

de de koi ham-saya-e-zindan mujhe ghar kash

dil walwala-e-shauq ka anjam to jaane

dekhen wo taghaful se idhar ek nazar kash

atwar zamane ke badal jate hain aaKHir

kuchh din ke liye ishq bhi ho jae hunar kash

is fitna-e-afaq ko kyon dekhne nikle

ruswa-e-jahan hote na yun shams-o-qamar kash

main ahd-e-jawani mein falak martaba hota

bar-e-gham-e-ulfat se nigun hoti kamar kash

be-dard nahin girya mera wo bhi to jaanen

ashkon mein chala aae koi laKHt-e-jigar kash

mujh be-sar-o-pa KHak-nashin ko bhi mile dad

ai bekasi-e-shauq wo aa jaen idhar kash

be-minnat-e-darban hai mujhe hasrat-e-didar

mahmil ka uDe parda sar-e-rahguzar kash