nae dar pe aqidat ho gai hai

na.e dar pe 'aqīdat ho ga.ī hai

unheñ phir se mohabbat ho ga.ī hai

haqīqat ko fasāna kar diyā hai

farebī ab sadāqat ho ga.ī hai

na āñkhoñ meñ rahā paanī hayā kā

adab tahzīb ruḳhsat ho ga.ī hai

chalā jaanā tirā achchhā huā hai

tumhāre ġham se fursat ho ga.ī hai

tamāsha dekhnā jachtā nahīñ thā

magar ab is kī 'ādat ho ga.ī hai

maze se zindagī kaTtī thī lekin

ta'alluq meñ siyāsat ho ga.ī hai

jinheñ uñglī pakaḌ chalnā sikhāyā

unheñ mujh se 'adāvat ho ga.ī hai

bharosa yuuñ nahīñ karnā kisī pe

dikhāve kī sharāfat ho ga.ī hai

'abhay' ke chāhne vaale bahut the

ġhazal kah dī to aafat ho ga.ī hai

nae dar pe 'aqidat ho gai hai

unhen phir se mohabbat ho gai hai

haqiqat ko fasana kar diya hai

farebi ab sadaqat ho gai hai

na aankhon mein raha pani haya ka

adab tahzib ruKHsat ho gai hai

chala jaana tera achchha hua hai

tumhaare gham se fursat ho gai hai

tamasha dekhna jachta nahin tha

magar ab is ki 'adat ho gai hai

maze se zindagi kaTti thi lekin

ta'alluq mein siyasat ho gai hai

jinhen ungli pakaD chalna sikhaya

unhen mujh se 'adawat ho gai hai

bharosa yun nahin karna kisi pe

dikhawe ki sharafat ho gai hai

'abhay' ke chahne wale bahut the

ghazal kah di to aafat ho gai hai