nae jaziron ki hum ko bhi chahaten thin bahut

na.e jazīroñ kī ham ko bhī chāhateñ thiiñ bahut

hamārī raah meñ lekin rivāyateñ thiiñ bahut

kahīñ bhī aag lage us kā naam aatā hai

use charāġh jalāne kī ādateñ thiiñ bahut

kisī kā lahja yaqīnan fareb lagtā thā

magar fareb ke pīchhe sadāqateñ thiiñ bahut

añdhere zaḳhm masā.il dhuāñ lahū aañsū

gañvāte ham bhī kahāñ tak virāsateñ thiiñ bahut

vo jis kī guftugū phūloñ kā isti.āra thī

ḳhamoshiyoñ meñ bhī us kī fasāhateñ thiiñ bahut

utārā jaatā thā sadqa hamārī jaan kā bhī

hamāre dam se bhī mansūb chāhateñ thiiñ bahut

bahut samajhte haiñ thoḌe likhe ko ham 'shādāb'

hamāre vāste ik do shikāyateñ thiiñ bahut

nae jaziron ki hum ko bhi chahaten thin bahut

hamari rah mein lekin riwayaten thin bahut

kahin bhi aag lage us ka nam aata hai

use charagh jalane ki aadaten thin bahut

kisi ka lahja yaqinan fareb lagta tha

magar fareb ke pichhe sadaqaten thin bahut

andhere zaKHm masail dhuan lahu aansu

ganwate hum bhi kahan tak wirasaten thin bahut

wo jis ki guftugu phulon ka istiara thi

KHamoshiyon mein bhi us ki fasahaten thin bahut

utara jata tha sadqa hamari jaan ka bhi

hamare dam se bhi mansub chahaten thin bahut

bahut samajhte hain thoDe likhe ko hum 'shadab'

hamare waste ek do shikayaten thin bahut