nae KHayalon se rabta kar nai zaminon pe shairi kar

na.e ḳhayāloñ se rābta kar na.ī zamīnoñ pe shā.irī kar

jo ishq kartī haiñ shā.irī se ab un hasīnoñ pe shā.irī kar

siyāh rāteñ udaas jugnū aur us pe sūraj kī be-niyāzī

ab ek misrā tarāsh aise tū aaj tīnoñ pe shā.irī kar

samundaroñ ke vo shāhzāde tamām lahroñ se āshnā the

jinhoñ ne dariyā ke paañv bāñdhe the un safīnoñ pe shā.irī kar

tū nukta-chīnoñ kī baat mat kar ye apnī zid par aḌe raheñge

jo log pāgal haiñ mere jaise unhīñ zahīnoñ pe shā.irī kar

merī buzurgoñ se dostī hai so āstānoñ pe likh rahā huuñ

tū apne yāroñ se bad-gumāñ hai to āstīnoñ pe shā.irī kar

jo ghar basāne kī aarzū hai to apne ghar se nikāl ḳhud ko

abhī makānoñ pe Daal miTTī abhī makīnoñ pe shā.irī kar

nae KHayalon se rabta kar nai zaminon pe shairi kar

jo ishq karti hain shairi se ab un hasinon pe shairi kar

siyah raaten udas jugnu aur us pe suraj ki be-niyazi

ab ek misra tarash aise tu aaj tinon pe shairi kar

samundaron ke wo shahzade tamam lahron se aashna the

jinhon ne dariya ke panw bandhe the un safinon pe shairi kar

tu nukta-chinon ki baat mat kar ye apni zid par aDe rahenge

jo log pagal hain mere jaise unhin zahinon pe shairi kar

meri buzurgon se dosti hai so aastanon pe likh raha hun

tu apne yaron se bad-guman hai to aastinon pe shairi kar

jo ghar basane ki aarzu hai to apne ghar se nikal KHud ko

abhi makanon pe Dal miTTi abhi makinon pe shairi kar