nae mizaj ki tashkil karna chahte hain

na.e mizāj kī tashkīl karnā chāhte haiñ

ham apne aap ko tabdīl karnā chāhte haiñ

qubūl tark-e-ta.alluq nahīñ hai lekin ham

tumhāre hukm kī ta.amīl karnā chāhte haiñ

ġhamoñ ke fiil na Dhā deñ kahīñ ye ka.aba-e-dil

so ham duā-e-abābīl karnā chāhte haiñ

hamāre jalne se miltī hai raushnī tum ko

to raushan ab yahī qindīl karnā chāhte haiñ

jab un kī koī bhī ta.abīr pā nahīñ sakte

havā meñ ḳhvāboñ ko tahlīl karnā chāhte haiñ

kitāb-e-zīst meñ mushkil hai bāb-e-ishq 'nadīm'

ham aise baab kī takmīl karnā chāhte haiñ

nae mizaj ki tashkil karna chahte hain

hum apne aap ko tabdil karna chahte hain

qubul tark-e-talluq nahin hai lekin hum

tumhaare hukm ki tamil karna chahte hain

ghamon ke fil na Dha den kahin ye kaba-e-dil

so hum dua-e-ababil karna chahte hain

hamare jalne se milti hai raushni tum ko

to raushan ab yahi qindil karna chahte hain

jab un ki koi bhi tabir pa nahin sakte

hawa mein KHwabon ko tahlil karna chahte hain

kitab-e-zist mein mushkil hai bab-e-ishq 'nadim'

hum aise bab ki takmil karna chahte hain