nae nae jo parinde hain sab uDan mein hain

na.e na.e jo parinde haiñ sab uḌaan meñ haiñ

ḳhirad ke maare hue ab talak gumān meñ haiñ

abhī sañbhāl ke rakkhe haiñ tiir tarkash meñ

so mumkināt abhī tak mirī kamān meñ haiñ

mujhe hai pās-e-vafā varna un se kah Dālūñ

huzūr jhol bahut aap ke bayān meñ haiñ

abhī bhī ḳhāna-e-dil meñ haiñ un kī āvāzeñ

makīñ chale ga.e yādeñ usī makān meñ haiñ

vafā-parastoñ kī qismat meñ saaya nā bhī sahī

magar ye kyā ki daġhābāz sā.ebān meñ haiñ

zabāñ ko sī ke rakho yā kaTāo sar apne

yahāñ ḳhamosh haiñ jo bas vahī amaan meñ haiñ

har ek saañs pe tāvān hai yahāñ lekin

hazār marne ke hiile tire jahān meñ haiñ

nae nae jo parinde hain sab uDan mein hain

KHirad ke mare hue ab talak guman mein hain

abhi sanbhaal ke rakkhe hain tir tarkash mein

so mumkinat abhi tak meri kaman mein hain

mujhe hai pas-e-wafa warna un se kah Dalun

huzur jhol bahut aap ke bayan mein hain

abhi bhi KHana-e-dil mein hain un ki aawazen

makin chale gae yaaden usi makan mein hain

wafa-paraston ki qismat mein saya na bhi sahi

magar ye kya ki daghabaz saeban mein hain

zaban ko si ke rakho ya kaTao sar apne

yahan KHamosh hain jo bas wahi aman mein hain

har ek sans pe tawan hai yahan lekin

hazar marne ke hile tere jahan mein hain