nae safar mein jo pichhle safar ke sathi the

na.e safar meñ jo pichhle safar ke sāthī the

phir aa.e yaad ki us rahguzar ke sāthī the

kahūñ bhī kyā mujhe pal-bhar meñ jo bikher ga.e

havā ke jhoñke mirī umr-bhar ke sāthī the

sitāre TuuT ga.e os bhī bikhar sī ga.ī

yahī the jo mirī shām-o-sahar ke sāthī the

shafaq ke saath bahut der tak dikhā.ī diye

vo saare log jo bas rāt-bhar ke sāthī the

ye kaisī hijr kī shab vo bhī saath chhoḌ ga.e

jo chāñd-tāre mirī chashm-e-tar ke sāthī the

nae safar mein jo pichhle safar ke sathi the

phir aae yaad ki us rahguzar ke sathi the

kahun bhi kya mujhe pal-bhar mein jo bikher gae

hawa ke jhonke meri umr-bhar ke sathi the

sitare TuT gae os bhi bikhar si gai

yahi the jo meri sham-o-sahar ke sathi the

shafaq ke sath bahut der tak dikhai diye

wo sare log jo bas raat-bhar ke sathi the

ye kaisi hijr ki shab wo bhi sath chhoD gae

jo chand-tare meri chashm-e-tar ke sathi the