nafaz-e-nazm pur-israr hai aisa nahin lagta

nafāz-e-nazm pur-isrār hai aisā nahīñ lagtā

gulistāñ meñ koī sarkār hai aisā nahīñ lagtā

yahāñ har jeb meñ ḳhvāboñ kī zar-muhreñ khanaktī haiñ

ye duniyā dard kā bāzār hai aisā nahīñ lagtā

ham apnī jhoñk meñ aage kī jānib baḌhte jaate haiñ

hamāre sāmne dīvār hai aisā nahīñ lagtā

sar-e-pindār se pā-e-junūñ kā rabt ġhā.eb hai

ye pīḌhī barsar-e-paikār hai aisā nahīñ lagtā

maiñ jaise ek rāh-e-sust-rau kī sair kartā huuñ

mirī rānoñ tale rahvār hai aisā nahīñ lagtā

umaD ke aayā to hai abr-e-girya matla-e-jāñ se

magar ye sā.iqa-bardār hai aisā nahīñ lagtā

ba-yak jast-e-tasavvur bazm-e-jānāñ meñ pahuñchtā hai

ye 'arshad' hijr kā bīmār hai aisā nahīñ lagtā

nafaz-e-nazm pur-israr hai aisa nahin lagta

gulistan mein koi sarkar hai aisa nahin lagta

yahan har jeb mein KHwabon ki zar-muhren khanakti hain

ye duniya dard ka bazar hai aisa nahin lagta

hum apni jhonk mein aage ki jaanib baDhte jate hain

hamare samne diwar hai aisa nahin lagta

sar-e-pindar se pa-e-junun ka rabt ghaeb hai

ye piDhi barsar-e-paikar hai aisa nahin lagta

main jaise ek rah-e-sust-rau ki sair karta hun

meri ranon tale rahwar hai aisa nahin lagta

umaD ke aaya to hai abr-e-girya matla-e-jaan se

magar ye saiqa-bardar hai aisa nahin lagta

ba-yak jast-e-tasawwur bazm-e-jaanan mein pahunchta hai

ye 'arshad' hijr ka bimar hai aisa nahin lagta