nafas-e-arzu hai shoala-taraaz

nafas-e-ārzū hai sho.ala-tarāz

soz-e-ehsās terī umr darāz

ḳhush haiñ khā kar fareb-e-'ishva-e-nāz

kis qadar sāda-dil haiñ ahl-e-niyāz

ban ga.ī gardish-e-jahāñ kī harīf

husn kī ik nigāh-e-fitna-tarāz

naam sunte hī āshiyāne kā

lauT aa.ī hai tāqat-e-parvāz

ḳhalish-e-dil baḌhā ga.ī kuchh aur

aap kī chashm-e-iltifāt-navāz

kahīñ ye un kī rah-guzar to nahīñ

jhuk paḌī hai 'ġhanī' jabīn-e-niyāz

ek hī saaz ke haiñ do naġhme

merī ḳhāmoshī aap kī āvāz

nafas-e-arzu hai shoala-taraaz

soz-e-ehsas teri umr daraaz

KHush hain kha kar fareb-e-'ishwa-e-naz

kis qadar sada-dil hain ahl-e-niyaz

ban gai gardish-e-jahan ki harif

husn ki ek nigah-e-fitna-taraaz

nam sunte hi aashiyane ka

lauT aai hai taqat-e-parwaz

KHalish-e-dil baDha gai kuchh aur

aap ki chashm-e-iltifat-nawaz

kahin ye un ki rah-guzar to nahin

jhuk paDi hai 'ghani' jabin-e-niyaz

ek hi saz ke hain do naghme

meri KHamoshi aap ki aawaz