nafas nafas hai bhanwar chaDhti shab ka manzar hai

nafas nafas hai bhañvar chaḌhtī shab kā manzar hai

hisār-e-jism meñ ik chīḳhtā samundar hai

havā-e-tāza ke mānind mat lipaT mujh se

ga.ī rutoñ kā bahut zahr mere andar hai

nikal ke jā.ūñ gunah-gār-e-tīrgī se kidhar

har ek haath meñ ab raushnī kā patthar hai

ik aag uḌtī huī sī vahī ta.āqub meñ

badan kī raakh abhī shāyad badan ke andar hai

tū kyuuñ uḌhātā hai mujh ko ye raushnī kī ridā

mujhe ḳhabar hai añdherā mirā muqaddar hai

salīb-e-shab se 'musavvir' sahar ke maqtal tak

kahāñ mileñ ki har ik fāsla barābar hai

nafas nafas hai bhanwar chaDhti shab ka manzar hai

hisar-e-jism mein ek chiKHta samundar hai

hawa-e-taza ke manind mat lipaT mujh se

gai ruton ka bahut zahr mere andar hai

nikal ke jaun gunah-gar-e-tirgi se kidhar

har ek hath mein ab raushni ka patthar hai

ek aag uDti hui si wahi taaqub mein

badan ki rakh abhi shayad badan ke andar hai

tu kyun uDhata hai mujh ko ye raushni ki rida

mujhe KHabar hai andhera mera muqaddar hai

salib-e-shab se 'musawwir' sahar ke maqtal tak

kahan milen ki har ek fasla barabar hai