nafas nafas zindagi ke ho kar ajal ki tashhir kar rahe hain

nafas nafas zindagī ke ho kar ajal kī tash.hīr kar rahe haiñ

ye kis jatan meñ lage haiñ ham sab kise jahāñgīr kar rahe haiñ

kahāñ pata thā tirī shafaq hī pas-e-ġhubār-e-zavāl hogī

tujhī ko mismār kar diyā thā tirī hī ta.amīr kar rahe haiñ

rah-e-shahādat pe sar ke hamrāh ik aaseb chal rahā hai

hamīñ na nikleñ yazīd-e-daurāñ ki ḳhud ko shabbīr kar rahe haiñ

sadā.eñ detī huī ḳhalā.eñ kahīñ zamīnoñ tak aa na jaa.eñ

ye ḳhvāb-kārī-e-pur-takalluf barā-e-ta.abīr kar rahe haiñ

agarche pahle yaqīn kam thā par ab to tasdīq ho chukī hai

na jaane radd-e-amal meñ kyuuñ ham mazīd tāḳhīr kar rahe haiñ

hamāre saare gunāh vaa.iz maqāla-e-iftitāhiya haiñ

abhī to ham nāma-e-amal kā muqaddama tahrīr kar rahe haiñ

nafas nafas zindagi ke ho kar ajal ki tashhir kar rahe hain

ye kis jatan mein lage hain hum sab kise jahangir kar rahe hain

kahan pata tha teri shafaq hi pas-e-ghubar-e-zawal hogi

tujhi ko mismar kar diya tha teri hi tamir kar rahe hain

rah-e-shahadat pe sar ke hamrah ek aaseb chal raha hai

hamin na niklen yazid-e-dauran ki KHud ko shabbir kar rahe hain

sadaen deti hui KHalaen kahin zaminon tak aa na jaen

ye KHwab-kari-e-pur-takalluf bara-e-tabir kar rahe hain

agarche pahle yaqin kam tha par ab to tasdiq ho chuki hai

na jaane radd-e-amal mein kyun hum mazid taKHir kar rahe hain

hamare sare gunah waiz maqala-e-iftitahiya hain

abhi to hum nama-e-amal ka muqaddama tahrir kar rahe hain