nafrat ke andheron ko miTa kyon nahin dete

nafrat ke añdheroñ ko miTā kyoñ nahīñ dete

lau sham-e-mohabbat kī baḌhā kyoñ nahīñ dete

chāhat hai agar amn kī ai amn ke ḳhūgar

dīvār ta.assub kī girā kyoñ nahīñ dete

kyoñ karte ho ḳhuuñ adl kā mansab kī ihānat

munsif ho to mujrim ko sazā kyoñ nahīñ dete

ai rahbaro tum jaise ho guftār meñ yaktā

kirdār kā sikka bhī biThā kyoñ nahīñ dete

tāriq sī futūhāt kā armān agar hai

sāhil pe safīne ko jalā kyoñ nahīñ dete

bante ho jo tum usva-e-aslāf ke pairav

dushnām-tarāzoñ ko duā kyoñ nahīñ dete

saf meñ jo adū sūrat-e-ahbāb haiñ un ke

chehroñ se hijābāt uThā kyoñ nahīñ dete

kyoñ jaate ho tum mujh ko lagāte hue Thokar

patthar huuñ to raste se haTā kyoñ nahīñ dete

'ahsan' tumheñ paanā hai jo me.arāj-e-bulandī

sar rab ke huzūr apnā jhukā kyoñ nahīñ dete

nafrat ke andheron ko miTa kyon nahin dete

lau sham-e-mohabbat ki baDha kyon nahin dete

chahat hai agar amn ki ai amn ke KHugar

diwar tassub ki gira kyon nahin dete

kyon karte ho KHun adl ka mansab ki ihanat

munsif ho to mujrim ko saza kyon nahin dete

ai rahbaro tum jaise ho guftar mein yakta

kirdar ka sikka bhi biTha kyon nahin dete

tariq si futuhat ka arman agar hai

sahil pe safine ko jala kyon nahin dete

bante ho jo tum uswa-e-aslaf ke pairaw

dushnam-taraazon ko dua kyon nahin dete

saf mein jo adu surat-e-ahbab hain un ke

chehron se hijabaat uTha kyon nahin dete

kyon jate ho tum mujh ko lagate hue Thokar

patthar hun to raste se haTa kyon nahin dete

'ahsan' tumhein pana hai jo mearaj-e-bulandi

sar rab ke huzur apna jhuka kyon nahin dete