nafrat ki aandhiyon ko mohabbat mein Dhaal kar

nafrat kī āñdhiyoñ ko mohabbat meñ Dhaal kar

tanhā khaḌī huuñ dasht meñ rishte sambhāl kar

mujh ko to tere dard bhī tujh se aziiz haiñ

baiThī huuñ dekh pyaar se jholī meñ Daal kar

ta.abīr DhūñDte hue rasta bhaTak ga.iiñ

ḳhvāboñ samet pheñk diiñ āñkheñ nikāl kar

shohrat kamā rahe ho tum aḳhbār kī tarah

apne parā.e logoñ kī pagḌī uchhāl kar

ik ḳhush-gumān aks kī bai'at se peshtar

ḳhush-baḳht aa.ine se to rishta bahāl kar

chhāyā huā hai baaġh meñ ḳhauf-o-hirās kyoñ

sahme hue gulāb haiñ ḳhushbū sambhāl kar

yā-rab kahāñ se laate haiñ ye log hausla

kāñToñ meñ pheñk dete haiñ phūloñ ko paal kar

nafrat ki aandhiyon ko mohabbat mein Dhaal kar

tanha khaDi hun dasht mein rishte sambhaal kar

mujh ko to tere dard bhi tujh se aziz hain

baiThi hun dekh pyar se jholi mein Dal kar

tabir DhunDte hue rasta bhaTak gain

KHwabon samet phenk din aankhen nikal kar

shohrat kama rahe ho tum aKHbar ki tarah

apne parae logon ki pagDi uchhaal kar

ek KHush-guman aks ki bai'at se peshtar

KHush-baKHt aaine se to rishta bahaal kar

chhaya hua hai bagh mein KHauf-o-hiras kyon

sahme hue gulab hain KHushbu sambhaal kar

ya-rab kahan se late hain ye log hausla

kanTon mein phenk dete hain phulon ko pal kar