nafrat qubul jo mile thoDa sa pyar bhi

nafrat qubūl jo mile thoḌā sā pyaar bhī

pahlū meñ gul ke shāḳh pe hote haiñ ḳhaar bhī

sab par huā ayaañ mirā hāl-e-shikast-e-dil

jab tak the ashk āñkhoñ meñ the rāzdār bhī

aa jā ki hai fasurda har ik gul tire baġhair

hai kis qadar udaas ye fasl-e-bahār bhī

ummīd ḳhatm tār-e-nafas TūTne lagā

kab saath chhoḌ de ye tirā intizār bhī

vahshat ne noch Daalā mire jism kā libās

baaqī rahe kahāñ vo garebāñ ke taar bhī

hotī nahīñ qubūl mirī koī bhī duā

shāyad ki hai ḳhafā mirā parvardigār bhī

'rāhī' milegī manzil-e-maqsūd kyā ḳhabar

hai qāfile kī raah meñ gard-o-ġhubār bhī

nafrat qubul jo mile thoDa sa pyar bhi

pahlu mein gul ke shaKH pe hote hain KHar bhi

sab par hua ayan mera haal-e-shikast-e-dil

jab tak the ashk aankhon mein the raazdar bhi

aa ja ki hai fasurda har ek gul tere baghair

hai kis qadar udas ye fasl-e-bahaar bhi

ummid KHatm tar-e-nafas TuTne laga

kab sath chhoD de ye tera intizar bhi

wahshat ne noch Dala mere jism ka libas

baqi rahe kahan wo gareban ke tar bhi

hoti nahin qubul meri koi bhi dua

shayad ki hai KHafa mera parwardigar bhi

'rahi' milegi manzil-e-maqsud kya KHabar

hai qafile ki rah mein gard-o-ghubar bhi