nafs-e-sag-e-palid ko gar apne mariye

nafs-e-sag-e-palīd ko gar apne māriye

mānind-e-sher dasht-e-jahāñ meñ Dakāriye

us gul ko josh-e-gul meñ ye kah kar ubhāriye

gulshan meñ andalīb ko chal kar pukāriye

phir murġh-e-dil ko phāñsiye phir jaal māriye

phir ho sake to aap se gesū sañvāriye

piirī meñ kaif-e-ishq se tauba to kījiye

manzil rahī hai thoḌī sī himmat na hāriye

girdāb-e-bahr-e-ishq ke chakkar haiñ raat din

kaun āshnā-e-hāl hai kis ko pukāriye

dil de ke jaur-o-zulm kā shikva na kījiye

do din kī zindagī kisī Dhab se guzāriye

ahl-e-havas kī dahr meñ miTTī ḳharāb hai

galiyoñ meñ ḳhaak chhān rahī haiñ niyāriye

mānind-e-zulf ġhair ko kyuuñ sar chaḌhā.iye

āñkhoñ se shakl-e-ashk ke is ko utāriye

paidā kareñ asar jo dur-e-ashk nāseho

un motiyoñ pe hañs ko sau baar vāriye

juz mere daal aap kī galtī nahīñ kahīñ

yuuñ muñh se jitnī chāhiye sheḳhī baghāriye

naala jo zer-e-teġh kiyā maiñ ne jis ghaḌī

bole ki ek dam ke liye dam na māriye

tauba sharāb-e-ishq se kis tarah kījiye

kyūñkar ye jin chaḌhā huā sar se utāriye

kyā kyā na dost apne miyān-e-adam ga.e

kis ko talāsh kījiye kis ko pukāriye

us but ke bahr-e-husn meñ dil ko Duboiye

is kashtī-e-hayāt ko yuuñ paar utāriye

manzūr ho jo rāhat-e-kaunain 'muntahī'

hāthoñ ko khīch lījiye paañv pasāriye

nafs-e-sag-e-palid ko gar apne mariye

manind-e-sher dasht-e-jahan mein Dakariye

us gul ko josh-e-gul mein ye kah kar ubhaariye

gulshan mein andalib ko chal kar pukariye

phir murgh-e-dil ko phansiye phir jal mariye

phir ho sake to aap se gesu sanwariye

piri mein kaif-e-ishq se tauba to kijiye

manzil rahi hai thoDi si himmat na haariye

girdab-e-bahr-e-ishq ke chakkar hain raat din

kaun aashna-e-haal hai kis ko pukariye

dil de ke jaur-o-zulm ka shikwa na kijiye

do din ki zindagi kisi Dhab se guzariye

ahl-e-hawas ki dahr mein miTTi KHarab hai

galiyon mein KHak chhan rahi hain niyariye

manind-e-zulf ghair ko kyun sar chaDhaiye

aankhon se shakl-e-ashk ke is ko utariye

paida karen asar jo dur-e-ashk naseho

un motiyon pe hans ko sau bar wariye

juz mere dal aap ki galti nahin kahin

yun munh se jitni chahiye sheKHi baghaariye

nala jo zer-e-tegh kiya main ne jis ghaDi

bole ki ek dam ke liye dam na mariye

tauba sharab-e-ishq se kis tarah kijiye

kyunkar ye jin chaDha hua sar se utariye

kya kya na dost apne miyan-e-adam gae

kis ko talash kijiye kis ko pukariye

us but ke bahr-e-husn mein dil ko Duboiye

is kashti-e-hayat ko yun par utariye

manzur ho jo rahat-e-kaunain 'muntahi'

hathon ko khich lijiye panw pasariye