nafsi-nafsi ka hai aalam sab hue na-ashna

nafsī-nafsī kā hai 'ālam sab hue nā-āshnā

mahshar-e-zo'm-e-ḳhirad meñ kaun kis kā āshnā

maiñ ne bhī bād-e-sabā ke haath ko bose diye

lams-e-gesū se tire dast-e-sabā thā āshnā

ārzū-mandī ko zarf-e-āgahī darkār hai

pahle honā chāhiye ham ko tamannā-āshnā

ajnabī tahzīb kā malbūs hai har jism par

har koī aqdār se apnī huā nā-āshnā

bāb-e-ulfat kā mudarris hai vahī is daur meñ

jo nahīñ harf-e-mohabbat se zarā sā āshnā

bul-havas kā zikr kyā ‘azm-o-‘amal ke bahr ko

paar karte haiñ shanāvar aur dariyā-āshnā

‘ishq-e-sādiq to hai ‘anqā aur ġhālib hai havas

aaj ke majnūñ kahāñ 'abrār' lailā-āshnā

nafsi-nafsi ka hai 'alam sab hue na-ashna

mahshar-e-zo'm-e-KHirad mein kaun kis ka aashna

main ne bhi baad-e-saba ke hath ko bose diye

lams-e-gesu se tere dast-e-saba tha aashna

aarzu-mandi ko zarf-e-agahi darkar hai

pahle hona chahiye hum ko tamanna-ashna

ajnabi tahzib ka malbus hai har jism par

har koi aqdar se apni hua na-ashna

bab-e-ulfat ka mudarris hai wahi is daur mein

jo nahin harf-e-mohabbat se zara sa aashna

bul-hawas ka zikr kya ‘azm-o-‘amal ke bahr ko

par karte hain shanawar aur dariya-ashna

‘ishq-e-sadiq to hai ‘anqa aur ghaalib hai hawas

aaj ke majnun kahan 'abrar' laila-ashna