naghma-e-kun se numudar ajab hosh hua

naġhma-e-kun se numūdār ajab hosh huā

dahr meñ jis ko sañbhālā vahī behosh huā

ḳhalvat-e-nāz meñ yuuñ koī ham-āġhosh huā

ilm dar siina mire dil se farāmosh huā

jaur-e-paiham ne kabhī dil se nikalne na diyā

dard baḌhtā hī rahā jab vo sitam-kosh huā

ishq meñ chāhiye har-lahza nirālī gardish

kyoñ vahāñ kātib-e-taqdīr subuk-dosh huā

yaad aa.e unheñ kuchh tark-e-jafā ke pahlū

haif-sad-haif ki maiñ dil se farāmosh huā

rang yā shakl na thā kyā nazar aatā vo hameñ

dīda-e-dil kī jagah zehn meñ rū-posh huā

har jagah tuur hai be-ḳhud hai jahāñ misl-e-kalīm

jalva-e-nau se vo hangāma farāmosh huā

hashr ke baad rahī hasrat-e-nazzāra mujhe

is tarah majma.a-e-ḳhūbāñ meñ vo rū-posh huā

kyā ho pādāsh-e-amal mast-e-azal hai 'nāzish'

yā ḳhudā tū ne pilā.ī to ye mai-nosh huā

naghma-e-kun se numudar ajab hosh hua

dahr mein jis ko sanbhaala wahi behosh hua

KHalwat-e-naz mein yun koi ham-aghosh hua

ilm dar sina mere dil se faramosh hua

jaur-e-paiham ne kabhi dil se nikalne na diya

dard baDhta hi raha jab wo sitam-kosh hua

ishq mein chahiye har-lahza nirali gardish

kyon wahan katib-e-taqdir subuk-dosh hua

yaad aae unhen kuchh tark-e-jafa ke pahlu

haif-sad-haif ki main dil se faramosh hua

rang ya shakl na tha kya nazar aata wo hamein

dida-e-dil ki jagah zehn mein ru-posh hua

har jagah tur hai be-KHud hai jahan misl-e-kalim

jalwa-e-nau se wo hangama faramosh hua

hashr ke baad rahi hasrat-e-nazzara mujhe

is tarah majma-e-KHuban mein wo ru-posh hua

kya ho padash-e-amal mast-e-azal hai 'nazish'

ya KHuda tu ne pilai to ye mai-nosh hua