naghma tha ya ki git sunai nahin diya

naġhma thā yā ki giit sunā.ī nahīñ diyā

aisā thā gahrā rang dikhā.ī nahīñ diyā

ubhrī thī ek shakl fasīl-e-nigāh par

phir us kā koī naqsh dikhā.ī nahīñ diyā

maiñ kheltā rahā unhīñ tuġhyāniyoñ ke biich

tūfāñ kā shor kuchh bhī sunā.ī nahīñ diyā

jab dil meñ aa gayā mire ghar-bār chhoḌ kar

phir aisā kyā huā ki dikhā.ī nahīñ diyā

tāroñ kī dhuup chhāñv meñ soyā tamām raat

jo ḳhvāb dekhnā thā dikhā.ī nahīñ diyā

āhistagī se vo mirī jaañ meñ utar gayā

hangāma aisā thā ki sunā.ī nahīñ diyā

Takrā ke ḳhud se rah ga.ī merī nigāh-e-shauq

maujoñ ke ār-pār dikhā.ī nahīñ diyā

har nok-e-ḳhār ko maiñ dikhātā lahū kā rang

sahrā ne izn-e-ābla-pā.ī nahīñ diyā

halchal machā dī us ne mirī zaat meñ magar

kuchh hausla-e-sang-kushā.ī nahīñ diyā

us kī sadā navāh-e-dil-e-yāsman kī thī

yaanī ki dars-e-sho.ala-navā.ī nahīñ diyā

baiThā huā hai ġham kī tarah dil kī raah meñ

us ne bichhaḌ ke dard-e-judā.ī nahīñ diyā

vo chāñd jis ko chāñd kaheñ kā.enāt kā

aisā to koī chāñd dikhā.ī nahīñ diyā

kyā naqsh-e-pā-e-gul haiñ jo taktā hai ġhaur se

mujh ko to kuchh zamīñ pe dikhā.ī nahīñ diyā

'ajmal' jamāl-e-yār kī ra.anā.ī kuchh na pūchh

aks-e-ruḳh-e-ḳhayāl dikhā.ī nahīñ diyā

naghma tha ya ki git sunai nahin diya

aisa tha gahra rang dikhai nahin diya

ubhri thi ek shakl fasil-e-nigah par

phir us ka koi naqsh dikhai nahin diya

main khelta raha unhin tughyaniyon ke bich

tufan ka shor kuchh bhi sunai nahin diya

jab dil mein aa gaya mere ghar-bar chhoD kar

phir aisa kya hua ki dikhai nahin diya

taron ki dhup chhanw mein soya tamam raat

jo KHwab dekhna tha dikhai nahin diya

aahistagi se wo meri jaan mein utar gaya

hangama aisa tha ki sunai nahin diya

Takra ke KHud se rah gai meri nigah-e-shauq

maujon ke aar-par dikhai nahin diya

har nok-e-KHar ko main dikhata lahu ka rang

sahra ne izn-e-abla-pai nahin diya

halchal macha di us ne meri zat mein magar

kuchh hausla-e-sang-kushai nahin diya

us ki sada nawah-e-dil-e-yasman ki thi

yani ki dars-e-shoala-nawai nahin diya

baiTha hua hai gham ki tarah dil ki rah mein

us ne bichhaD ke dard-e-judai nahin diya

wo chand jis ko chand kahen kaenat ka

aisa to koi chand dikhai nahin diya

kya naqsh-e-pa-e-gul hain jo takta hai ghaur se

mujh ko to kuchh zamin pe dikhai nahin diya

'ajmal' jamal-e-yar ki ranai kuchh na puchh

aks-e-ruKH-e-KHayal dikhai nahin diya