naghma yun saz mein taDpa meri jaan ho jaise

naġhma yuuñ saaz meñ taḌpā mirī jaañ ho jaise

merā dam ho mire siine kī fuġhāñ ho jaise

yak-ba-yak ruuh meñ uTThā hai vo tūfān-e-ḳhamosh

vādi-e-gul meñ nasīm-e-guzarāñ ho jaise

naġhma-o-raqs huī jaatī hai har mauj-e-ḳhayāl

chāñdnī-rāt meñ dariyā kā samāñ ho jaise

kyā sunātī hai ye sāzoñ kī sadā-e-dil-soz

kuchh hamīñ dard-nasīboñ kā bayāñ ho jaise

yuuñ tirī chashm-e-mudārāt pe dil bholā hai

nashsha-e-mai pe javānī kā gumāñ ho jaise

dil hai yuuñ be-dilī-e-hosh ke hāthoñ larzāñ

koī qātil se talab-gār-e-amāñ ho jaise

raah jiine kī kahāñ soḳhta-jānī ke baġhair

har nafas sho.ala-e-ḳhātir kā dhuāñ ho jaise

ḳhuub naqsha hai mire fikr kī jaulānī kā

koī kam-baḳht asīrī meñ javāñ ho jaise

us ne yuuñ arz-e-mohabbat pe sambhal kar dekhā

us ke dil ko to ḳhabar ho na gumāñ ho jaise

ik navā hāsil-e-sad-ahd-e-fuġhāñ hai 'haqqī'

bū-e-gul laakh bahāroñ kā nishāñ ho jaise

naghma yun saz mein taDpa meri jaan ho jaise

mera dam ho mere sine ki fughan ho jaise

yak-ba-yak ruh mein uTTha hai wo tufan-e-KHamosh

wadi-e-gul mein nasim-e-guzaran ho jaise

naghma-o-raqs hui jati hai har mauj-e-KHayal

chandni-raat mein dariya ka saman ho jaise

kya sunati hai ye sazon ki sada-e-dil-soz

kuchh hamin dard-nasibon ka bayan ho jaise

yun teri chashm-e-mudaraat pe dil bhola hai

nashsha-e-mai pe jawani ka guman ho jaise

dil hai yun be-dili-e-hosh ke hathon larzan

koi qatil se talab-gar-e-aman ho jaise

rah jine ki kahan soKHta-jaani ke baghair

har nafas shoala-e-KHatir ka dhuan ho jaise

KHub naqsha hai mere fikr ki jaulani ka

koi kam-baKHt asiri mein jawan ho jaise

us ne yun arz-e-mohabbat pe sambhal kar dekha

us ke dil ko to KHabar ho na guman ho jaise

ek nawa hasil-e-sad-ahd-e-fughan hai 'haqqi'

bu-e-gul lakh bahaaron ka nishan ho jaise