naghmon ka shahr tha kabhi aahon ka shahr tha

naġhmoñ kā shahr thā kabhī aahoñ kā shahr thā

ye dil tirī badaltī nigāhoñ kā shahr thā

ham log totā-chashm mizājan na the magar

nazreñ badalne vaalī nigāhoñ kā shahr thā

koThe pe khāñstī huī buḌhiyā kī aañkh meñ

bīmār zindagī kī karāhoñ kā shahr thā

vo dūriyoñ ke ḳhauf se ghar meñ paḌā rahā

varna zarā idhar mirī hā hoñ kā shahr thā

mariyam sī barguzīda kisī maañ kā thā sarūp

ġhurbat meñ palne vaale gunāhoñ kā shahr thā

naghmon ka shahr tha kabhi aahon ka shahr tha

ye dil teri badalti nigahon ka shahr tha

hum log tota-chashm mizajan na the magar

nazren badalne wali nigahon ka shahr tha

koThe pe khansti hui buDhiya ki aankh mein

bimar zindagi ki karahon ka shahr tha

wo duriyon ke KHauf se ghar mein paDa raha

warna zara idhar meri ha hon ka shahr tha

mariyam si barguzida kisi man ka tha sarup

ghurbat mein palne wale gunahon ka shahr tha