naghmon ke qafile ka main tanha naqib tha

naġhmoñ ke qāfile kā maiñ tanhā naqīb thā

yā shāḳh-e-kā.enāt pe ik andalīb thā

apnā koī rafīq na koī raqīb thā

maiñ ḳhvāhishoñ kī bazm meñ sab ke qarīb thā

ziine pe qasr-e-vaqt ke chaḌhtā chalā gayā

merā shikasta hausla jo ḳhush-nasīb thā

us ke badan se lipTī huī thī lahū kī shāḳh

vo shaḳhs jo ki shahr-e-anā kā ḳhatīb thā

thiiñ āsmāñ kī vus.ateñ apnī nigāh meñ

lamhāt-e-gum-shuda kā tasavvur ajiib thā

girdāb-e-hādsāt meñ ham phañs ke rah ga.e

jab sāhil-e-murād bahut hī qarīb thā

logoñ se mil rahī thī use raushnī kī bhiik

dil ke hasīñ dayār meñ 'jāmī' ġharīb thā

naghmon ke qafile ka main tanha naqib tha

ya shaKH-e-kaenat pe ek andalib tha

apna koi rafiq na koi raqib tha

main KHwahishon ki bazm mein sab ke qarib tha

zine pe qasr-e-waqt ke chaDhta chala gaya

mera shikasta hausla jo KHush-nasib tha

us ke badan se lipTi hui thi lahu ki shaKH

wo shaKHs jo ki shahr-e-ana ka KHatib tha

thin aasman ki wusaten apni nigah mein

lamhat-e-gum-shuda ka tasawwur ajib tha

girdab-e-hadsat mein hum phans ke rah gae

jab sahil-e-murad bahut hi qarib tha

logon se mil rahi thi use raushni ki bhik

dil ke hasin dayar mein 'jami' gharib tha