nahin aate hain hum apni samajh mein

nahīñ aate haiñ ham apnī samajh meñ

to kaise ā.eñge sab kī samajh meñ

jise aatā na ho paanī samajh meñ

use kyā aa.egī machhlī samajh meñ

maiñ apne naam kī taḳhtī nahīñ huuñ

ki jo aa jaa.e paḌhte hī samajh meñ

tumheñ chāñd aur tāroñ kī paḌī hai

hameñ aatī nahīñ miTTī samajh meñ

jo tum se der tak bāteñ karegā

nahīñ aa.egā vo jaldī samajh meñ

kisī kā āḳhirī ḳhat paḌh liyā hai

nahīñ aa.egā ab kuchh bhī samajh meñ

vahī to dāstāñ rahtī hai zinda

ki jo aatī nahīñ puurī samajh meñ

badal kar rakh diyā manzar ḳhizāñ ne

abhī aa.ī hī thī titlī samajh meñ

nahin aate hain hum apni samajh mein

to kaise aaenge sab ki samajh mein

jise aata na ho pani samajh mein

use kya aaegi machhli samajh mein

main apne nam ki taKHti nahin hun

ki jo aa jae paDhte hi samajh mein

tumhein chand aur taron ki paDi hai

hamein aati nahin miTTi samajh mein

jo tum se der tak baaten karega

nahin aaega wo jaldi samajh mein

kisi ka aaKHiri KHat paDh liya hai

nahin aaega ab kuchh bhi samajh mein

wahi to dastan rahti hai zinda

ki jo aati nahin puri samajh mein

badal kar rakh diya manzar KHizan ne

abhi aai hi thi titli samajh mein