nahin haal-e-dehli sunane ke qabil

nahīñ hāl-e-dehlī sunāne ke qābil

ye qissa hai aañsū bahāne ke qābil

ujāḌe haiñ vo qasr ek ek us ke

jo the dekhne aur dikhāne ke qābil

na aa.ī ḳhush ābādī un kī falak ko

na the varna vo to miTāne ke qābil

na paayā koī aur in ke sivā kyā

falak kyā vahī the satāne ke qābil

kiyā aah barbād chun chun ke in ko

na the jo ki barbād jaane ke qābil

milāyā jinheñ ḳhaak meñ tū ne vo to

na the ḳhaak meñ yuuñ milāne ke qābil

nahīñ ghus lagāne ko chiḌiyā talak vo

jahāñ jam.a the ik zamāne ke qābil

sitam sā sitam tū ne Dhāyā hai zālim

nahīñ baat ye muñh pe laane ke qābil

unheñ ḳhāk-e-zillat pe Tapkā hai the vo

jo āñkhoñ ke uupar biThāne ke qābil

kaheñ haiñ sab ahbāb dehlī ko chaliye

rahī hai kahāñ ab vo jaane ke qābil

jise dekh kahte the sayyāh-e-ālam

ye hai jā-e-ārām paane ke qābil

use dekh bulbul bhī kahtī hai ye jā

nahīñ āshiyāñ ab banāne ke qābil

sunā jis ne ye haal afsos khāyā

ye hai haal afsos khāne ke qābil

ilāhī basā phir tū apne karam se

use kyūñki hai vo basāne ke qābil

dukhā.e haiñ afsos vo dil falak ne

na the 'aish' jo dil dukhāne ke qābil

nahin haal-e-dehli sunane ke qabil

ye qissa hai aansu bahane ke qabil

ujaDe hain wo qasr ek ek us ke

jo the dekhne aur dikhane ke qabil

na aai KHush aabaadi un ki falak ko

na the warna wo to miTane ke qabil

na paya koi aur in ke siwa kya

falak kya wahi the satane ke qabil

kiya aah barbaad chun chun ke in ko

na the jo ki barbaad jaane ke qabil

milaya jinhen KHak mein tu ne wo to

na the KHak mein yun milane ke qabil

nahin ghus lagane ko chiDiya talak wo

jahan jama the ek zamane ke qabil

sitam sa sitam tu ne Dhaya hai zalim

nahin baat ye munh pe lane ke qabil

unhen KHak-e-zillat pe Tapka hai the wo

jo aankhon ke upar biThane ke qabil

kahen hain sab ahbab dehli ko chaliye

rahi hai kahan ab wo jaane ke qabil

jise dekh kahte the sayyah-e-alam

ye hai ja-e-aram pane ke qabil

use dekh bulbul bhi kahti hai ye ja

nahin aashiyan ab banane ke qabil

suna jis ne ye haal afsos khaya

ye hai haal afsos khane ke qabil

ilahi basa phir tu apne karam se

use kyunki hai wo basane ke qabil

dukhae hain afsos wo dil falak ne

na the 'aish' jo dil dukhane ke qabil