nahin hai ghar koi be-ghar dikhai deta hai

nahīñ hai ghar koī be-ghar dikhā.ī detā hai

jo mujh ko ḳhvāb meñ aksar dikhā.ī detā hai

bhulā chukā hai mohabbat kī tai-shuda sharteñ

vo jis ke haath meñ ḳhanjar dikhā.ī detā hai

vahīñ pe shajr-e-mohabbat kī chhāñv qatl huī

jahāñ pe dhuup kā lashkar dikhā.ī detā hai

milegā kyā koī pursān-e-hāl raat ga.e

har ek lamha sitamgar dikhā.ī detā hai

huī haiñ kaise fanā jaane sar-phirī maujeñ

bujhā-bujhā sā samundar dikhā.ī detā hai

na sun sakegā koī bhī mirī sadā 'māñjhī'

ye shahr ghaaT kā patthar dikhā.ī detā hai

nahin hai ghar koi be-ghar dikhai deta hai

jo mujh ko KHwab mein aksar dikhai deta hai

bhula chuka hai mohabbat ki tai-shuda sharten

wo jis ke hath mein KHanjar dikhai deta hai

wahin pe shajr-e-mohabbat ki chhanw qatl hui

jahan pe dhup ka lashkar dikhai deta hai

milega kya koi pursan-e-haal raat gae

har ek lamha sitamgar dikhai deta hai

hui hain kaise fana jaane sar-phiri maujen

bujha-bujha sa samundar dikhai deta hai

na sun sakega koi bhi meri sada 'manjhi'

ye shahr ghaT ka patthar dikhai deta hai