nahin hai pas magar tu dikhai deta hai

nahīñ hai paas magar tū dikhā.ī detā hai

tirā ḳhayāl mujhe kab rihā.ī detā hai

tire laboñ se adā ho agar koī jumla

mujhe vo sher kī sūrat sunā.ī detā hai

mirā gumān badal jaatā hai haqīqat meñ

baġhair pūchhe jab apnī safā.ī detā hai

ghaTā bhī de ye judā.ī kā be-samar mausam

bhalā tū kyoñ mujhe zaḳhm-e-judā.ī detā hai

qarīb aa ke faqat ek fikr lāhaq hai

vo dil tak apne mujhe kab rasā.ī detā hai

mire rafīq mire ġham-gusār tū hī batā

har ek chehre meñ vo kyoñ dikhā.ī detā hai

mirī kitāb kī koī ġhazal uThā le tū

har ek sher kā misrā duhā.ī detā hai

jo merī maane to 'farruḳh' use bhulā de ab

vafā ke badle meñ jo bevafā.ī detā hai

nahin hai pas magar tu dikhai deta hai

tera KHayal mujhe kab rihai deta hai

tere labon se ada ho agar koi jumla

mujhe wo sher ki surat sunai deta hai

mera guman badal jata hai haqiqat mein

baghair puchhe jab apni safai deta hai

ghaTa bhi de ye judai ka be-samar mausam

bhala tu kyon mujhe zaKHm-e-judai deta hai

qarib aa ke faqat ek fikr lahaq hai

wo dil tak apne mujhe kab rasai deta hai

mere rafiq mere gham-gusar tu hi bata

har ek chehre mein wo kyon dikhai deta hai

meri kitab ki koi ghazal uTha le tu

har ek sher ka misra duhai deta hai

jo meri mane to 'farruKH' use bhula de ab

wafa ke badle mein jo bewafai deta hai