nahin hai ras zamane ka rakh-rakhaw mujhe

nahīñ hai raas zamāne kā rakh-rakhāv mujhe

maiñ ik chaTā.ī huuñ mahloñ meñ mat bichhāo mujhe

abhī to qaid huuñ maiñ apnī guuñj ke andar

sadā.eñ do na abhī duur kī sadāo mujhe

adab huuñ aur na koī falsafa na mantiq huuñ

maiñ ek harf huuñ har dars meñ paḌhāo mujhe

girūñ jo ḳhaak pe to ḳhaak bhī mirī na mile

kam-az-kam itnī bulandī se to girāo mujhe

mire sukūt ne baḳhshī hai tum ko goyā.ī

biThāo sar pe mire shahr kī havāo mujhe

sunūñ to kis kī sunūñ kis kī samt dauḌūñ maiñ

yahāñ to ek hī āvāz hai bachāo mujhe

sulagtī ruuh kī tasvīr kaise lī tum ne

vo zāviya vo tarīqa vo fan sikhāo mujhe

maiñ har sadī huuñ har ik daur har zamāna huuñ

tum apne vaqt ke album meñ mat sajāo mujhe

anā kī aag huuñ sho'loñ kā jism huuñ 'vasfī'

jalā rahā hai mirī zaat kā alaav mujhe

nahin hai ras zamane ka rakh-rakhaw mujhe

main ek chaTai hun mahlon mein mat bichhao mujhe

abhi to qaid hun main apni gunj ke andar

sadaen do na abhi dur ki sadao mujhe

adab hun aur na koi falsafa na mantiq hun

main ek harf hun har dars mein paDhao mujhe

girun jo KHak pe to KHak bhi meri na mile

kam-az-kam itni bulandi se to girao mujhe

mere sukut ne baKHshi hai tum ko goyai

biThao sar pe mere shahr ki hawao mujhe

sunun to kis ki sunun kis ki samt dauDun main

yahan to ek hi aawaz hai bachao mujhe

sulagti ruh ki taswir kaise li tum ne

wo zawiya wo tariqa wo fan sikhao mujhe

main har sadi hun har ek daur har zamana hun

tum apne waqt ke album mein mat sajao mujhe

ana ki aag hun sho'lon ka jism hun 'wasfi'

jala raha hai meri zat ka alaw mujhe