nahin hai yaad kahan aur kidhar mila tha mujhe

nahīñ hai yaad kahāñ aur kidhar milā thā mujhe

vo bad-tamīz adab se magar milā thā mujhe

vagarna maiñ to nahīñ huuñ chhupā huā ḳhud se

milā thā jo bhī tire naam par milā thā mujhe

jo kar diyā hai yahī thā mire liye mumkin

ki vaqt bhī to bahut muḳhtasar milā thā mujhe

phir us ke baa'd mujhe aa gayā thā hañsnā bhī

maiñ ro rahā thā ki jab ḳhush-ḳhabar milā thā mujhe

milā nahīñ thā mujhe umr bhar vo DhūñDne se

magar milā to sar-e-rahguzar milā thā mujhe

achānak us kī nazar mujh pe paḌ ga.ī thī kyā

vo kaam chhoḌ ke sab dauḌ kar milā thā mujhe

'hanīf' roz-e-azal jab hunar hue taqsīm

to shā.irī hī kā shāyad hunar milā thā mujhe

nahin hai yaad kahan aur kidhar mila tha mujhe

wo bad-tamiz adab se magar mila tha mujhe

wagarna main to nahin hun chhupa hua KHud se

mila tha jo bhi tere nam par mila tha mujhe

jo kar diya hai yahi tha mere liye mumkin

ki waqt bhi to bahut muKHtasar mila tha mujhe

phir us ke ba'd mujhe aa gaya tha hansna bhi

main ro raha tha ki jab KHush-KHabar mila tha mujhe

mila nahin tha mujhe umr bhar wo DhunDne se

magar mila to sar-e-rahguzar mila tha mujhe

achanak us ki nazar mujh pe paD gai thi kya

wo kaam chhoD ke sab dauD kar mila tha mujhe

'hanif' roz-e-azal jab hunar hue taqsim

to shairi hi ka shayad hunar mila tha mujhe