nahin hai yaad ki wo yaad kab nahin aaya

nahīñ hai yaad ki vo yaad kab nahīñ aayā

use bhulā ke maiñ jī luuñ ye Dhab nahīñ aayā

ye sab ġhalat hai ki suntā nahīñ kisī kī vo

ye sach nahīñ ki pukārā to rab nahīñ aayā

vo yuuñ to aatā hai jaatā hai merī sāñsoñ meñ

bulāyā vaise use jab vo tab nahīñ aayā

kisī ko rizq na pahuñchā ho shaam se pahle

abhī zamīn pe aisā ġhazab nahīñ aayā

maiñ be-lihāz huuñ shāyad tabhī akelā huuñ

mire mizāj meñ ab tak adab nahīñ aayā

bhulā chukā huuñ maiñ 'sā.im' hazār bātoñ ko

rahā hai yaad bas itnā vo jab nahīñ aayā

nahin hai yaad ki wo yaad kab nahin aaya

use bhula ke main ji lun ye Dhab nahin aaya

ye sab ghalat hai ki sunta nahin kisi ki wo

ye sach nahin ki pukara to rab nahin aaya

wo yun to aata hai jata hai meri sanson mein

bulaya waise use jab wo tab nahin aaya

kisi ko rizq na pahuncha ho sham se pahle

abhi zamin pe aisa ghazab nahin aaya

main be-lihaz hun shayad tabhi akela hun

mere mizaj mein ab tak adab nahin aaya

bhula chuka hun main 'saim' hazar baaton ko

raha hai yaad bas itna wo jab nahin aaya