nahin hone ka ye KHun-e-jigar band

nahīñ hone kā ye ḳhūn-e-jigar band

na bāñdhī āstīn āñkhoñ pe tar band

na pūchho bebasī apnā hai vo haal

asīr-e-rishta-bar-pā murġh-e-par band

judā hotā nahīñ pahlū se dam-bhar

ye dāġh-e-dil hai yā koī jigar-band

kahīñ aisā na ho vo aa ke phir jaa.e

kisī shab band hoñ āñkheñ na dar band

yahī qāsid patā hai us ke ghar kā

udhar jā jis taraf hai rahguzar band

ye chausar ishq-bāzī kī hai ai dil

na chalnā chaal vo jis se ho ghar band

ijāzat ik taḌap kī de jo sayyād

qafas ko le uḌeñ ham murġh-e-par-band

ye hāl-e-nā-tavānī hai ki āñkheñ

khulīñ jo ek dam to dopahar band

nahīñ ye putliyāñ o chashm-e-fattāñ

tire ghar meñ haiñ do fitne nazar-band

maiñ ghabrātā huuñ mahram se tumhārī

khule dil kī girah kholo agar band

duā ye māñgtā huuñ maiñ shab-e-vasl

qayāmat tak rahī bāb-e-sahar band

ḳhudā jaane kahāñ huuñ aur kyā huuñ

khule ahvāl kyā jab ho ḳhabar band

jo haath aa.eñ use ye dāna-e-ashk

rahī musht-e-sadaf misl-e-guhar-band

likhegā hāl-e-dil ai 'bahr' kab tak

bas ab vaifar lagā maktūb kar band

nahin hone ka ye KHun-e-jigar band

na bandhi aastin aankhon pe tar band

na puchho bebasi apna hai wo haal

asir-e-rishta-bar-pa murgh-e-par band

juda hota nahin pahlu se dam-bhar

ye dagh-e-dil hai ya koi jigar-band

kahin aisa na ho wo aa ke phir jae

kisi shab band hon aankhen na dar band

yahi qasid pata hai us ke ghar ka

udhar ja jis taraf hai rahguzar band

ye chausar ishq-bazi ki hai ai dil

na chalna chaal wo jis se ho ghar band

ijazat ek taDap ki de jo sayyaad

qafas ko le uDen hum murgh-e-par-band

ye haal-e-na-tawani hai ki aankhen

khulin jo ek dam to dopahar band

nahin ye putliyan o chashm-e-fattan

tere ghar mein hain do fitne nazar-band

main ghabraata hun mahram se tumhaari

khule dil ki girah kholo agar band

dua ye mangta hun main shab-e-wasl

qayamat tak rahi bab-e-sahar band

KHuda jaane kahan hun aur kya hun

khule ahwal kya jab ho KHabar band

jo hath aaen use ye dana-e-ashk

rahi musht-e-sadaf misl-e-guhar-band

likhega haal-e-dil ai 'bahr' kab tak

bas ab waifar laga maktub kar band