nahin jati agar ye aasman tak

nahīñ jaatī agar ye āsmāñ tak

to phir is chīḳh kī had hai kahāñ tak

chalo paanī se vo sho.ala nikāleñ

uThā.e jo zamīñ ko āsmāñ tak

ab agle moḌ par pātāl hogā

yaqīñ se aa gayā huuñ maiñ gumāñ tak

zamāne ko samajh paayā nahīñ huuñ

maiñ samjhātā rahūñ ḳhud ko kahāñ tak

ajab ik khel khelā jā rahā hai

na thā jis kā hameñ koī gumāñ tak

bahut hī ḳhūbsūrat rāsta hai

jo sīdhā jā rahā hai rā.egāñ tak

zamīñ ke baab meñ kuchh mashvare haiñ

zarā maiñ jā rahā huuñ āsmāñ tak

nahin jati agar ye aasman tak

to phir is chiKH ki had hai kahan tak

chalo pani se wo shoala nikalen

uThae jo zamin ko aasman tak

ab agle moD par patal hoga

yaqin se aa gaya hun main guman tak

zamane ko samajh paya nahin hun

main samjhata rahun KHud ko kahan tak

ajab ek khel khela ja raha hai

na tha jis ka hamein koi guman tak

bahut hi KHubsurat rasta hai

jo sidha ja raha hai raegan tak

zamin ke bab mein kuchh mashware hain

zara main ja raha hun aasman tak