nahin ki baad tere dusra nahin aaya

nahīñ ki baa'd tire dūsrā nahīñ aayā

jo ziist ko thā mayassar maza nahīñ aayā

bichhaḌ gayā hai to aise palaT ke aayā nahīñ

vagarna raah meñ tūfān kyā nahīñ aayā

bas ek raat qayāmat sī mujh ko thī darpesh

phir is ke baa'd koī marhala nahīñ aayā

maiñ apnī aadhī mohabbat pe ab huuñ girya-kunāñ

mujhe to Dhang koī 'mīr' sā nahīñ aayā

jahāñ se aayā thā tū dil kisī kī aas liye

udāsiyoñ meñ vahīñ lauT jā nahīñ aayā

abhī tū aas kī sham.oñ kī lau bujhā hī de

vo jis ke aane kā imkān thā nahīñ aayā

agarche us se baḌī muddatoñ se rabt nahīñ

diloñ ke biich magar fāsla nahīñ aayā

vo aur hoñge jinheñ chāñd aur taare mile

yahāñ to hisse meñ TuuTā diyā nahīñ aayā

'rashīd' mujh se mire nāma-bar ne hañs ke kahā

koī bhī naama tire naam kā nahīñ aayā

nahin ki ba'd tere dusra nahin aaya

jo zist ko tha mayassar maza nahin aaya

bichhaD gaya hai to aise palaT ke aaya nahin

wagarna rah mein tufan kya nahin aaya

bas ek raat qayamat si mujh ko thi darpesh

phir is ke ba'd koi marhala nahin aaya

main apni aadhi mohabbat pe ab hun girya-kunan

mujhe to Dhang koi 'mir' sa nahin aaya

jahan se aaya tha tu dil kisi ki aas liye

udasiyon mein wahin lauT ja nahin aaya

abhi tu aas ki shamon ki lau bujha hi de

wo jis ke aane ka imkan tha nahin aaya

agarche us se baDi muddaton se rabt nahin

dilon ke bich magar fasla nahin aaya

wo aur honge jinhen chand aur tare mile

yahan to hisse mein TuTa diya nahin aaya

'rashid' mujh se mere nama-bar ne hans ke kaha

koi bhi nama tere nam ka nahin aaya