nahin ki wo mujhe tanha udas chhoD gaya

nahīñ ki vo mujhe tanhā udaas chhoḌ gayā

mire navāh ko bhī vaqf-e-yās chhoḌ gayā

adā ho us kī navāzish kā shukriya kyūñkar

jo de ke mujh ko ġham-e-be-qayās chhoḌ gayā

vafā kī raah meñ qurbān ho ke vo mujh ko

bhare jahān meñ vaqf-e-hirās chhoḌ gayā

ye mere haal pe us ke karam kī arzānī

jo gahrī yaas meñ thoḌī sī aas chhoḌ gayā

atā-e-husn-shanāsī ke baa'd vo mujh ko

jahān-e-husn meñ bahr-e-sipās chhoḌ gayā

luTā ke jalva-e-ruḳhsār-o-lab kī rangīnī

vo phuul phuul ko rangīñ libās chhoḌ gayā

mire ḳhulūs ko hāsil thā e.atibār us kā

vo mere dil meñ ġhamoñ kī asaas chhoḌ gayā

us ek bosa-e-ruḳhsat kī lazzat-āgīnī

jo mere hoñToñ pe sadiyoñ kī pyaas chhoḌ gayā

vo apne husn ko hamrāh le gayā lekin

hazār husn mire ās-pās chhoḌ gayā

ajiib tohfa hai us kī taraf se mere liye

kitāb-e-ishq kā jo iqtibās chhoḌ gayā

judā.ī us kī baḌī talḳh hai magar 'maġhmūm

mirī navā meñ vo apnī miThās chhoḌ gayā

nahin ki wo mujhe tanha udas chhoD gaya

mere nawah ko bhi waqf-e-yas chhoD gaya

ada ho us ki nawazish ka shukriya kyunkar

jo de ke mujh ko gham-e-be-qayas chhoD gaya

wafa ki rah mein qurban ho ke wo mujh ko

bhare jahan mein waqf-e-hiras chhoD gaya

ye mere haal pe us ke karam ki arzani

jo gahri yas mein thoDi si aas chhoD gaya

ata-e-husn-shanasi ke ba'd wo mujh ko

jahan-e-husn mein bahr-e-sipas chhoD gaya

luTa ke jalwa-e-ruKHsar-o-lab ki rangini

wo phul phul ko rangin libas chhoD gaya

mere KHulus ko hasil tha eatibar us ka

wo mere dil mein ghamon ki asas chhoD gaya

us ek bosa-e-ruKHsat ki lazzat-agini

jo mere honTon pe sadiyon ki pyas chhoD gaya

wo apne husn ko hamrah le gaya lekin

hazar husn mere aas-pas chhoD gaya

ajib tohfa hai us ki taraf se mere liye

kitab-e-ishq ka jo iqtibas chhoD gaya

judai us ki baDi talKH hai magar 'maghmum

meri nawa mein wo apni miThas chhoD gaya