nahin kuchh bhi karne se baz aa gaya kya

nahīñ kuchh bhī karne se baaz aa gayā kyā

ye dil apnī fursat se uktā gayā kyā

koī mujh asīr-e-havas ko ye pūchhe

sukūñ mil gayā kyā qarār aa gayā kyā

vo jis baat par tum ne parkhī hai duniyā

kabhī ḳhud ko bhī āzmāyā gayā kyā

hai chup chup sā kyoñ bazm-e-yārāñ kā 'ālam

jo kahnā nahīñ thā vo bolā gayā kyā

tire saath rah kar bhī auroñ ke the ham

ḳhayāl aur kuchh thā pe sochā gayā kyā

har ik baat par itnī qasmeñ na khaao

tumhārā koī jhuuT pakḌā gayā kyā

'amar' lā-ubālī tabī'at kā mālik

ḳhud apne taġhāful se maarā gayā kyā

nahin kuchh bhi karne se baz aa gaya kya

ye dil apni fursat se ukta gaya kya

koi mujh asir-e-hawas ko ye puchhe

sukun mil gaya kya qarar aa gaya kya

wo jis baat par tum ne parkhi hai duniya

kabhi KHud ko bhi aazmaya gaya kya

hai chup chup sa kyon bazm-e-yaran ka 'alam

jo kahna nahin tha wo bola gaya kya

tere sath rah kar bhi auron ke the hum

KHayal aur kuchh tha pe socha gaya kya

har ek baat par itni qasmen na khao

tumhaara koi jhuT pakDa gaya kya

'amar' la-ubaali tabi'at ka malik

KHud apne taghaful se mara gaya kya