nahin kuchh faiz hasil tha zamane se KHafa ho kar

nahīñ kuchh faiz hāsil thā zamāne se ḳhafā ho kar

maiñ dīvāna banā huuñ ḳhud hī us but par fanā ho kar

merī duniyā meñ ashk-o-ḳhūñ kā tāñtā rahā har-dam

kabhī terī vafāoñ meñ kabhī tum se judā ho kar

tasavvur meñ bhī pindār-e-vafā kā lutf hāsil thā

tumhārī zulf-e-qātil-e-pesha ke ḳham meñ fanā ho kar

gañvā.ī ashkoñ ne tāsīr jo ḳhūn-e-jigar kī thī

girā jab āb-e-gauhar bhī libās-e-tan pe vā ho kar

yahī duniyā kī tañg-bīnī se miltā hai vafāoñ ko

judā ho jaate haiñ āshiq sanam se bevafā ho kar

vahī be-sūd sī bandish zamāne ke usūloñ kī

vafā ko qaid kar detī haiñ zanjīreñ sazā ho kar

maiñ kin majbūriyoñ kā ab karūñ mātam batā 'bāliġh'

jo paayā be-ḳhudī meñ vo gañvāyā āshnā ho kar

nahin kuchh faiz hasil tha zamane se KHafa ho kar

main diwana bana hun KHud hi us but par fana ho kar

meri duniya mein ashk-o-KHun ka tanta raha har-dam

kabhi teri wafaon mein kabhi tum se juda ho kar

tasawwur mein bhi pindar-e-wafa ka lutf hasil tha

tumhaari zulf-e-qatil-e-pesha ke KHam mein fana ho kar

ganwai ashkon ne tasir jo KHun-e-jigar ki thi

gira jab aab-e-gauhar bhi libas-e-tan pe wa ho kar

yahi duniya ki tang-bini se milta hai wafaon ko

juda ho jate hain aashiq sanam se bewafa ho kar

wahi be-sud si bandish zamane ke usulon ki

wafa ko qaid kar deti hain zanjiren saza ho kar

main kin majburiyon ka ab karun matam bata 'baaligh'

jo paya be-KHudi mein wo ganwaya aashna ho kar