nahin malum ab ki sal mai-KHane pe kya guzra

nahīñ ma.alūm ab kī saal mai-ḳhāne pe kyā guzrā

hamāre tauba kar lene se paimāne pe kyā guzrā

barahman sar ko apne pīTtā thā dair ke aage

ḳhudā jaane tirī sūrat se but-ḳhāne pe kyā guzrā

mujhe zanjīr kar rakkhā hai un shahrī ġhazāloñ ne

nahīñ ma.alūm mere ba.ad vīrāne pe kyā guzrā

hue haiñ chuur mere ustuḳhvāñ patthar se Takrā ke

na pūchhā ye kabhī tū ne ki dīvāne pe kyā guzrā

'yaqīñ' kab yaar mere soz-e-dil kī daad ko pahuñche

kahāñ hai sham.a ko parvā ki parvāne pe kyā guzrā

nahin malum ab ki sal mai-KHane pe kya guzra

hamare tauba kar lene se paimane pe kya guzra

barahman sar ko apne piTta tha dair ke aage

KHuda jaane teri surat se but-KHane pe kya guzra

mujhe zanjir kar rakkha hai un shahri ghazalon ne

nahin malum mere baad virane pe kya guzra

hue hain chur mere ustuKHwan patthar se Takra ke

na puchha ye kabhi tu ne ki diwane pe kya guzra

'yaqin' kab yar mere soz-e-dil ki dad ko pahunche

kahan hai shama ko parwa ki parwane pe kya guzra