nahin malum kyon nyara lage hai

nahīñ mā'lūm kyoñ nyārā lage hai

sitam-gar hai magar pyārā lage hai

nazar qātil adā.eñ jān-levā

badūñ hathiyār hattyārā lage hai

ġhazab meñ vo jalāl-e-mehr-e-tābāñ

tabassum meñ vo mah-pāra lage hai

jigar thāme khaḌā hai rāste meñ

ye koī dard kā maarā lage hai

bahut ummīd ne dhoke diye haiñ

baḌī makkār ayyāra lage hai

jamāl-ārā.ī kā hai ab ye 'ālam

hai sin sattar kā aTThārah lage hai

ḳhudā sab kā ḳhudā hai shaiḳh sāhab

vahī merā jo tum.hārā lage hai

'adū kyoñ aaj hai mahfil se ġhā.eb

huā nau aur do gyārah lage hai

safar kam muḳhtasar hai zindagī kā

ki 'arsa 'umr kā saarā lage hai

havā meñ mahl sab kyoñ haiñ banāte

na patthar iiñT aur gaarā lage hai

huā ehsās-e-tanhā.ī ziyāda

baje haiñ raat ke baara lage hai

vafūr-e-ārzū-e-vasl 'shāhid'

fasād-e-nafs kā maarā lage hai

nahin ma'lum kyon nyara lage hai

sitam-gar hai magar pyara lage hai

nazar qatil adaen jaan-lewa

badun hathiyar hattyara lage hai

ghazab mein wo jalal-e-mehr-e-taban

tabassum mein wo mah-para lage hai

jigar thame khaDa hai raste mein

ye koi dard ka mara lage hai

bahut ummid ne dhoke diye hain

baDi makkar ayyara lage hai

jamal-arai ka hai ab ye 'alam

hai sin sattar ka aTThaarah lage hai

KHuda sab ka KHuda hai shaiKH sahab

wahi mera jo tumhaara lage hai

'adu kyon aaj hai mahfil se ghaeb

hua nau aur do gyarah lage hai

safar kam muKHtasar hai zindagi ka

ki 'arsa 'umr ka sara lage hai

hawa mein mahl sab kyon hain banate

na patthar inT aur gara lage hai

hua ehsas-e-tanhai ziyaada

baje hain raat ke bara lage hai

wafur-e-arzu-e-wasl 'shahid'

fasad-e-nafs ka mara lage hai