nahin malum wo apni wafa ko kya samajhte hain

nahīñ ma.alūm vo apnī vafā ko kyā samajhte haiñ

tire inkār karne ko bhī jo va.adā samajhte haiñ

zamāne ko tumhārā aur tumheñ apnā samajhte haiñ

agar aisā samajhte haiñ to kyā bejā samajhte haiñ

na pūchho ham mohabbat kī ḳhalish ko kyā samajhte haiñ

ye vo ne.amat hai jis ko hāsil-e-duniyā samajhte haiñ

pahuñch jaane meñ un tak hai to bas ye zindagī haa.il

ham apnī saañs ko bhī raah kā kāñTā samajhte haiñ

zamīñ se sar uThāte hī nigāheñ chaar ho jaa.eñ

haqīqat meñ usī sajde ko ham sajda samajhte haiñ

sunānā thā dil-e-betāb kā qissa sunā Daalā

vo sun kar dekhiye kyā sochte haiñ kyā samajhte haiñ

unhīñ ke vāste haiñ imtihān-e-ishq kī qaideñ

jo apnī hasti-e-mauhūm kā manshā samajhte haiñ

vafādāroñ se pūchho narḳh apnī jins-e-ulfat kā

agar sar de ke bhī mil jaa.e to sastā samajhte haiñ

unhīñ ke sar rahā kartā hai mohrā nā-ḳhudā.ī kā

jo qatre kī haqīqat ko bhī ik dariyā samajhte haiñ

gila be-sūd hai ai 'jurm' be-mehrī-e-ālam kā

burā kuchh log kahte haiñ to kuchh achchhā samajhte haiñ

nahin malum wo apni wafa ko kya samajhte hain

tere inkar karne ko bhi jo wada samajhte hain

zamane ko tumhaara aur tumhein apna samajhte hain

agar aisa samajhte hain to kya beja samajhte hain

na puchho hum mohabbat ki KHalish ko kya samajhte hain

ye wo neamat hai jis ko hasil-e-duniya samajhte hain

pahunch jaane mein un tak hai to bas ye zindagi hail

hum apni sans ko bhi rah ka kanTa samajhte hain

zamin se sar uThate hi nigahen chaar ho jaen

haqiqat mein usi sajde ko hum sajda samajhte hain

sunana tha dil-e-betab ka qissa suna Dala

wo sun kar dekhiye kya sochte hain kya samajhte hain

unhin ke waste hain imtihan-e-ishq ki qaiden

jo apni hasti-e-mauhum ka mansha samajhte hain

wafadaron se puchho narKH apni jins-e-ulfat ka

agar sar de ke bhi mil jae to sasta samajhte hain

unhin ke sar raha karta hai mohra na-KHudai ka

jo qatre ki haqiqat ko bhi ek dariya samajhte hain

gila be-sud hai ai 'jurm' be-mehri-e-alam ka

bura kuchh log kahte hain to kuchh achchha samajhte hain