nahin milte jahan mein zaKHm-e-pinhan dekhne wale

nahīñ milte jahāñ meñ zaḳhm-e-pinhāñ dekhne vaale

bahut mil jā.eñge chāk-e-garebāñ dekhne vaale

ḳhudā jaane ye kyā tāsīr hai zulf-e-pareshāñ meñ

pareshāñ haiñ tirī zulf-e-pareshāñ dekhne vaale

nazar ke hosh uḌ jaate haiñ ba.az-auqāt ujāle meñ

nazar rakkheñ añdhere meñ charāġhāñ dekhne vaale

tumheñ tūfāñ se kyā nisbat tumheñ sāhil pe rahnā hai

salāmat haiñ abhī ham zor-e-tūfāñ dekhne vaale

yahāñ insāniyat kī nabz hai bechain rukne ko

ḳhudā jaane kahāñ haiñ nabz-e-daurāñ dekhne vaale

dil-e-pur-dard meñ kuchh daaġh raushan ham bhī rakhte haiñ

idhar aa.eñ zarā bazm-e-charāġhāñ dekhne vaale

tasavvur meñ safar nazroñ kā kis se tai huā 'aḳhtar'

kahāñ haiñ un ko nazdīk-e-rag-e-jāñ dekhne vaale

nahin milte jahan mein zaKHm-e-pinhan dekhne wale

bahut mil jaenge chaak-e-gareban dekhne wale

KHuda jaane ye kya tasir hai zulf-e-pareshan mein

pareshan hain teri zulf-e-pareshan dekhne wale

nazar ke hosh uD jate hain baz-auqat ujale mein

nazar rakkhen andhere mein charaghan dekhne wale

tumhein tufan se kya nisbat tumhein sahil pe rahna hai

salamat hain abhi hum zor-e-tufan dekhne wale

yahan insaniyat ki nabz hai bechain rukne ko

KHuda jaane kahan hain nabz-e-dauran dekhne wale

dil-e-pur-dard mein kuchh dagh raushan hum bhi rakhte hain

idhar aaen zara bazm-e-charaghan dekhne wale

tasawwur mein safar nazron ka kis se tai hua 'aKHtar'

kahan hain un ko nazdik-e-rag-e-jaan dekhne wale