nahin pita main par nawazish hui hai

nahīñ piitā maiñ par navāzish huī hai

baḌī mausamoñ kī sifārish huī hai

bahut din se sahrā ke jaisā ye dil hai

na bādal ghire haiñ na bārish huī hai

yahāñ hai bulandī jo kirdār kī to

vahāñ ḳhāl-o-ḳhad kī numā.ish huī hai

tirī jhiil jaisī jo dekhī haiñ āñkheñ

mirī Duub jaane kī ḳhvāhish huī hai

chhalaktā nahīñ ḳhuun zaḳhmoñ se aise

kahīñ nāḳhunoñ kī bhī kāvish huī hai

hameñ 'ishq meñ mubtalā kar rahe haiñ

nazar aur dil meñ ye sāzish huī hai

vahāñ dushmanoñ kī baḌī yaad aa.ī

jahāñ dostoñ kī navāzish huī hai

vafā-dāriyoñ kā sila mil rahā hai

hamārī sadā āzmā.ish huī hai

pareshāniyoñ meñ jo ham mubtalā haiñ

yaqīnan koī ham se laġhzish huī hai

vahīñ apnī āñkhoñ ko ham chhoḌ aa.e

jahāñ manzaroñ kī numā.ish huī hai

raqīboñ ko hai chhūT mahfil meñ un kī

mire aane jaane pe bandish huī hai

ġhazal kahnā 'fārūq' maiñ chhoḌ dūñgā

isī baat par un se ranjish huī hai

nahin pita main par nawazish hui hai

baDi mausamon ki sifarish hui hai

bahut din se sahra ke jaisa ye dil hai

na baadal ghire hain na barish hui hai

yahan hai bulandi jo kirdar ki to

wahan KHal-o-KHad ki numaish hui hai

teri jhil jaisi jo dekhi hain aankhen

meri Dub jaane ki KHwahish hui hai

chhalakta nahin KHun zaKHmon se aise

kahin naKHunon ki bhi kawish hui hai

hamein 'ishq mein mubtala kar rahe hain

nazar aur dil mein ye sazish hui hai

wahan dushmanon ki baDi yaad aai

jahan doston ki nawazish hui hai

wafa-dariyon ka sila mil raha hai

hamari sada aazmaish hui hai

pareshaniyon mein jo hum mubtala hain

yaqinan koi hum se laghzish hui hai

wahin apni aankhon ko hum chhoD aae

jahan manzaron ki numaish hui hai

raqibon ko hai chhuT mahfil mein un ki

mere aane jaane pe bandish hui hai

ghazal kahna 'faruq' main chhoD dunga

isi baat par un se ranjish hui hai