nahin shuur-e-nazar kisi mein

nahīñ shu.ūr-e-nazar kisī meñ

hazāroñ ġham haiñ mirī hañsī meñ

nahīñ hai me.aar koī baaqī

na dushmanī meñ na dostī meñ

na chheḌ un ko ai jazba-e-dil

vo ro paḌeñge hañsī hañsī meñ

payambar-e-tīrgī bhī ik din

zarūr ā.eñge raushnī meñ

zarā koī rāhbar se kah de

ki rāz-e-manzil hai gumrahī meñ

mazāq-e-mahfil girā huā hai

na TuuTe dil koī dil-lagī meñ

bujhī huī sham.a saath le kar

bhaTak rahe haiñ vo tīrgī meñ

ḳhudā kā irfāñ yahī hai 'ashraf'

ki lutf aa jaa.e bandagī meñ

nahin shuur-e-nazar kisi mein

hazaron gham hain meri hansi mein

nahin hai mear koi baqi

na dushmani mein na dosti mein

na chheD un ko ai jazba-e-dil

wo ro paDenge hansi hansi mein

payambar-e-tirgi bhi ek din

zarur aaenge raushni mein

zara koi rahbar se kah de

ki raaz-e-manzil hai gumrahi mein

mazaq-e-mahfil gira hua hai

na TuTe dil koi dil-lagi mein

bujhi hui shama sath le kar

bhaTak rahe hain wo tirgi mein

KHuda ka irfan yahi hai 'ashraf'

ki lutf aa jae bandagi mein