nahin tha koi bhi phir bhi thin aahaTen kya kya

nahīñ thā koī bhī phir bhī thiiñ āhaTeñ kyā kyā

tamām-rāt huiiñ dil pe dastakeñ kyā kyā

na miT sake kisī sūrat bhī mere dil ke shokūk

tirī nigāh ne kī haiñ vazāhateñ kyā kyā

ye aarzū hai ki in meñ ho koī tujh jaisā

nazar meñ ghūmtī rahtī sūrateñ kyā kyā

kisī ke tarz-e-taġhāful pe kis liye ilzām

mujhe to ḳhud se rahī haiñ shikāyateñ kyā kyā

simaT ga.e haiñ mohabbat ke dā.eroñ meñ ham

bikhar ga.ī haiñ fazā.eñ hikāyateñ kyā kyā

ḳhud apnī zindagī bhī apnī dastaras meñ nahīñ

qadam qadam pe badaltī hai karvaTeñ kyā kyā

kisī kī chashm-e-tavajjoh na uTh sakī mujh par

mirī nazar meñ thiiñ varna guzārisheñ kyā kyā

ye rañg laa.ī hai ahbāb kī ḳhirad-mandī

ujaḌ ke rah ga.iiñ mahfil kī raunaqeñ kyā kyā

tamām valvale vo sard paḌ chuke ai 'arsh'

hamāre dil meñ thiiñ varna harārateñ kyā kyā

nahin tha koi bhi phir bhi thin aahaTen kya kya

tamam-raat huin dil pe dastaken kya kya

na miT sake kisi surat bhi mere dil ke shokuk

teri nigah ne ki hain wazahaten kya kya

ye aarzu hai ki in mein ho koi tujh jaisa

nazar mein ghumti rahti suraten kya kya

kisi ke tarz-e-taghaful pe kis liye ilzam

mujhe to KHud se rahi hain shikayaten kya kya

simaT gae hain mohabbat ke daeron mein hum

bikhar gai hain fazaen hikayaten kya kya

KHud apni zindagi bhi apni dastaras mein nahin

qadam qadam pe badalti hai karwaTen kya kya

kisi ki chashm-e-tawajjoh na uTh saki mujh par

meri nazar mein thin warna guzarishen kya kya

ye rang lai hai ahbab ki KHirad-mandi

ujaD ke rah gain mahfil ki raunaqen kya kya

tamam walwale wo sard paD chuke ai 'arsh'

hamare dil mein thin warna hararaten kya kya