nahin ye jit nahin hai tu isko mat samajh

nahīñ ye jiit nahīñ hai tū is ko maat samajh

ki tere saath yahāñ ho gayā hai haath samajh

maiñ apne payāde se terā vazīr māruñgā

ba-ġhaur dekh mirī chaal vārdāt samajh

kisī kisī pe hī khulte haiñ pech-o-ḳham mere

maiñ itnā sahl nahīñ merī mushkilāt samajh

mohabbat itnī ri.āyat nahīñ diyā kartī

agar vo hañs ke bhī dekhe to iltifāt samajh

mirī kahānī tire chehre par likhī huī hai

maiñ aa.ina huuñ mujhe dekh aur baat samajh

dafīna jaan in āñkhoñ ko hijr meñ us ke

jo in meñ ashk haiñ pinhāñ navādirāt samajh

guzar chukā hai agar tū sin-e-bulūġhat se

tū apne jism ko ab vājibuzzakāt samajh

nazar ko ek hī nuqte pe murtakiz kar le

dil-o-nigāh kī uljhan ko ek saath samajh

dhaḌak rahā hai ye kis shaḳhs kī mohabbat meñ

samajh meñ aa.eñ to dil ke muāmalāt samajh

ye chalte-phirte hue but haiñ aadmī to nahīñ

zamīñ pe chār-sū barpā hai somnāt samajh

ik ek lafz alāmat hai husn-e-fitrat kī

ye shā.irī hai so is kī jamāliyāt samajh

ruke hue bhī safar kar rahī hai ḳhaak mirī

guzar rahī hai guzāre binā hayāt samajh

khulī hai jab se tirī kīna-parvarī mujh par

to aa ga.ī hai mujhe ek ek baat samajh

tujhe ye ishq kī jānib dhakel saktā hai

samajh rahā hai to dil ko bhī dost ghaat samajh

jo mujh pe biitā hai maiñ ne vahī likhā hai 'zeb'

tū mere sheroñ ko bas mere tajrabāt samajh

nahin ye jit nahin hai tu is ko mat samajh

ki tere sath yahan ho gaya hai hath samajh

main apne payaade se tera wazir marunga

ba-ghaur dekh meri chaal wardat samajh

kisi kisi pe hi khulte hain pech-o-KHam mere

main itna sahl nahin meri mushkilat samajh

mohabbat itni riayat nahin diya karti

agar wo hans ke bhi dekhe to iltifat samajh

meri kahani tere chehre par likhi hui hai

main aaina hun mujhe dekh aur baat samajh

dafina jaan in aankhon ko hijr mein us ke

jo in mein ashk hain pinhan nawadiraat samajh

guzar chuka hai agar tu sin-e-bulughat se

tu apne jism ko ab wajibuzzakat samajh

nazar ko ek hi nuqte pe murtakiz kar le

dil-o-nigah ki uljhan ko ek sath samajh

dhaDak raha hai ye kis shaKHs ki mohabbat mein

samajh mein aaen to dil ke muamalat samajh

ye chalte-phirte hue but hain aadmi to nahin

zamin pe chaar-su barpa hai somnat samajh

ek ek lafz alamat hai husn-e-fitrat ki

ye shairi hai so is ki jamaliyat samajh

ruke hue bhi safar kar rahi hai KHak meri

guzar rahi hai guzare bina hayat samajh

khuli hai jab se teri kina-parwari mujh par

to aa gai hai mujhe ek ek baat samajh

tujhe ye ishq ki jaanib dhakel sakta hai

samajh raha hai to dil ko bhi dost ghat samajh

jo mujh pe bita hai main ne wahi likha hai 'zeb'

tu mere sheron ko bas mere tajrabaat samajh