nai duniya tera charcha bahut hai

na.ī duniyā tirā charchā bahut hai

mirā beTā bhī āvāra bahut hai

maiñ shāyad pāgaloñ sā lag rahā huuñ

vo mujh ko dekh kar hañstā bahut hai

ye bikhrī pattiyāñ jis phuul kī haiñ

vo apnī shāḳh par mahkā bahut hai

simaT jaa.eñ to dushman ke muqābil

hamārī qaum kā bachcha bahut hai

samundar se muāfī chāhte haiñ

hamārī pyaas ko qatra bahut hai

usī ke saa.e meñ kab se khaḌā huuñ

vo ik dīvār jo ḳhasta bahut hai

maiñ kab tak dar-ba-dar phirtā rahūñgā

tumhāre ghar kā darvāza bahut hai

ġhazal bhārat meñ likkhī jā rahī hai

magar ham-sā.e kā charchā bahut hai

use ustād kahtā hai zamāna

jo paḌhtā kam hai aur likhtā bahut hai

nai duniya tera charcha bahut hai

mera beTa bhi aawara bahut hai

main shayad pagalon sa lag raha hun

wo mujh ko dekh kar hansta bahut hai

ye bikhri pattiyan jis phul ki hain

wo apni shaKH par mahka bahut hai

simaT jaen to dushman ke muqabil

hamari qaum ka bachcha bahut hai

samundar se muafi chahte hain

hamari pyas ko qatra bahut hai

usi ke sae mein kab se khaDa hun

wo ek diwar jo KHasta bahut hai

main kab tak dar-ba-dar phirta rahunga

tumhaare ghar ka darwaza bahut hai

ghazal bhaarat mein likkhi ja rahi hai

magar ham-sae ka charcha bahut hai

use ustad kahta hai zamana

jo paDhta kam hai aur likhta bahut hai