nai ghazal ka nai fikr-o-agagi ka waraq

na.ī ġhazal kā na.ī fikr-o-āgagī kā varaq

zamāna khol rahā hai suḳhanvarī kā varaq

mohabbatoñ ke hasīñ baab se zarā aage

kitāb-e-zīst meñ miltā hai gumrahī kā varaq

sunahrī sā.ateñ mansūb haiñ tire ġham se

palaT ke dekh zarā merī zindagī kā varaq

kitāb vaqt kī āñdhī meñ khul ga.ī shāyad

havā meñ uḌ gayā derīna dostī kā varaq

tilāvatoñ meñ haiñ masrūf tā.irān-e-sahar

ufuq ne kholā hai kirnoñ kī raushnī kā varaq

mile haiñ aaj suḳhan mere sab ḳhatoñ ke javāb

jo mere haath lagā us kī Diary kā varaq

nai ghazal ka nai fikr-o-agagi ka waraq

zamana khol raha hai suKHanwari ka waraq

mohabbaton ke hasin bab se zara aage

kitab-e-zist mein milta hai gumrahi ka waraq

sunahri saaten mansub hain tere gham se

palaT ke dekh zara meri zindagi ka waraq

kitab waqt ki aandhi mein khul gai shayad

hawa mein uD gaya derina dosti ka waraq

tilawaton mein hain masruf tairan-e-sahar

ufuq ne khola hai kirnon ki raushni ka waraq

mile hain aaj suKHan mere sab KHaton ke jawab

jo mere hath laga us ki Diary ka waraq