nai ghazlen likhun kis ke liye aur git sajaun kis ke liye

na.ī ġhazleñ likhūñ kis ke liye aur giit sajā.ūñ kis ke liye

mirā ham-dam mujh se ruuTh gayā ab naġhme gā.ūñ kis ke liye

vo paas jo thā to us ke liye auroñ se bhī laḌnā paḌtā thā

ab kis ke liye maiñ kis se laḌūñ aur ḳhud ko jalā.ūñ kis ke liye

ik us ke tabassum kī ḳhātir dukh-dard hazāroñ sahtā thā

ab kis ke liye dukh-dard sahūñ aur ashk bahā.ūñ kis ke liye

vo thā to faqat us kī ḳhātir auroñ se bhī milnā paḌtā thā

ab aise vaise logoñ ke maiñ naaz uThā.ūñ kis ke liye

maiñ us ke liye hī sañvartā thā aur ḳhud ko sajāyā kartā thā

ab ḳhud ko sañvārūñ kis ke liye aur ghar ko sajā.ūñ kis ke liye

jab des meñ koī apnā thā pardes meñ kab jī lagtā thā

ab kis ke liye ghar yaad aa.e aur des ko jā.ūñ kis ke liye

us kā nahīñ 'ārif' koī badal aisā hai vo merā jān-e-ġhazal

ab us ke sivā kyā yaad rakhūñ aur us ko bhulā.ūñ kis ke liye

nai ghazlen likhun kis ke liye aur git sajaun kis ke liye

mera ham-dam mujh se ruTh gaya ab naghme gaun kis ke liye

wo pas jo tha to us ke liye auron se bhi laDna paDta tha

ab kis ke liye main kis se laDun aur KHud ko jalaun kis ke liye

ek us ke tabassum ki KHatir dukh-dard hazaron sahta tha

ab kis ke liye dukh-dard sahun aur ashk bahaun kis ke liye

wo tha to faqat us ki KHatir auron se bhi milna paDta tha

ab aise waise logon ke main naz uThaun kis ke liye

main us ke liye hi sanwarta tha aur KHud ko sajaya karta tha

ab KHud ko sanwarun kis ke liye aur ghar ko sajaun kis ke liye

jab des mein koi apna tha pardes mein kab ji lagta tha

ab kis ke liye ghar yaad aae aur des ko jaun kis ke liye

us ka nahin 'arif' koi badal aisa hai wo mera jaan-e-ghazal

ab us ke siwa kya yaad rakhun aur us ko bhulaun kis ke liye