nai sahar hai ye logo naya sawera hai

na.ī sahar hai ye logo nayā saverā hai

tulūa ho chukā sūraj magar añdherā hai

ḳhudā hī jaane ye dil kab ḳhudā kā ghar hogā

abhī to is meñ butān-e-havas kā Derā hai

abhī na de mujhe āvāz ai ġham-e-jānāñ

abhī to shahr-e-vafā meñ baḌā añdherā hai

na sā.ebān na āñgan na chhat na raushan-dān

aur is pe sab se laḌā.ī ki ghar ye merā hai

ye dār-o-gīr kī duniyā meñ kahnā mushkil hai

ki kaun is meñ luTā kaun yaañ luTerā hai

ye saare jhagḌe haiñ bas ek do pahar ke liye

ki nūr-e-mehr na merā hai aur na terā hai

vafā nisār ho us kī vafā-shanāsī par

hazār gardishoñ ke ba.ad bhī jo merā hai

nai sahar hai ye logo naya sawera hai

tulua ho chuka suraj magar andhera hai

KHuda hi jaane ye dil kab KHuda ka ghar hoga

abhi to is mein butan-e-hawas ka Dera hai

abhi na de mujhe aawaz ai gham-e-jaanan

abhi to shahr-e-wafa mein baDa andhera hai

na saeban na aangan na chhat na raushan-dan

aur is pe sab se laDai ki ghar ye mera hai

ye dar-o-gir ki duniya mein kahna mushkil hai

ki kaun is mein luTa kaun yan luTera hai

ye sare jhagDe hain bas ek do pahar ke liye

ki nur-e-mehr na mera hai aur na tera hai

wafa nisar ho us ki wafa-shanasi par

hazar gardishon ke baad bhi jo mera hai