nai shabahat ke marhale se guzar raha hun

na.ī shabāhat ke marhale se guzar rahā huuñ

ki maiñ bashārat ke marhale se guzar rahā huuñ

na.e na.e mehr-o-māh se ham kalām huuñ maiñ

maqām-e-hairat ke marhale se guzar rahā huuñ

safar meñ aatā hai istaqāmat kā marhala bhī

so istaqāmat ke marhale se guzar hā huuñ

to phir mirā bhī kahīñ to dārussalām hogā

tavāf-o-hijrat ke marhale se guzar rahā huuñ

savād-e-shab meñ lahū-ḳhazāna bikher dūñgā

suḳhan shahādat ke marhale se guzar rahā huuñ

malāmatī aur karāmatī log jānte haiñ

na.ī haqīqat ke marhale se guzar rahā huuñ

mire muqābil meñ aa.ine kā kamāl kyā hai

tulūa-e-qāmat ke marhale se guzar rahā huuñ

'yagānā' aur 'shād' 'ārfī' saath chal rahe haiñ

suḳhan meñ jiddat ke marhale se guzar rahā huuñ

sulūk aur ma.arifat kī rāheñ khulī haiñ 'shaukat'

so maiñ sharī.at ke marhale se guzar rahā huuñ

nai shabahat ke marhale se guzar raha hun

ki main bashaarat ke marhale se guzar raha hun

nae nae mehr-o-mah se hum kalam hun main

maqam-e-hairat ke marhale se guzar raha hun

safar mein aata hai istaqamat ka marhala bhi

so istaqamat ke marhale se guzar ha hun

to phir mera bhi kahin to darussalam hoga

tawaf-o-hijrat ke marhale se guzar raha hun

sawad-e-shab mein lahu-KHazana bikher dunga

suKHan shahadat ke marhale se guzar raha hun

malamati aur karamati log jaante hain

nai haqiqat ke marhale se guzar raha hun

mere muqabil mein aaine ka kamal kya hai

tulua-e-qamat ke marhale se guzar raha hun

'yagana' aur 'shad' 'arfi' sath chal rahe hain

suKHan mein jiddat ke marhale se guzar raha hun

suluk aur marifat ki rahen khuli hain 'shaukat'

so main shariat ke marhale se guzar raha hun