nai wabastagi paida hui hai kuza-gar se

na.ī vābastagī paidā huī hai kūza-gar se

hamārī dostī hone lagī hai kūza-gar se

kisī ko kūza-gar se vālihāna 'ishq hai aur

kisī ko intihā kī dushmanī hai kūza-gar se

na.ī tahzīb kā kaḌvā dhuāñ phailā huā hai

havā miTTī kī ḳhushbū māñgtī hai kūza-gar se

tumheñ miTTī se sharf-e-ham-kalāmī kā pata hai

mirā matlab kabhī koī baat kī hai kūza-gar se

kisī devī ne kūza-gar kī peshānī ko chūmā

koī devī bahut sharmā rahī hai kūza-gar se

ye barqī qumqumoñ kī raushnī hairān-kun hai

magar bāzār meñ jo raushnī hai kūza-gar se

sunā hai maiñ ne mallāhoñ se qissa pāniyoñ kā

kahānī apnī miTTī kī sunī hai kūza-gar se

tumhāre paas hai hī kyā jise duniyā sarāhe

tumhārī kaun-sī 'ādat bhalī hai kūza-gar se

nai wabastagi paida hui hai kuza-gar se

hamari dosti hone lagi hai kuza-gar se

kisi ko kuza-gar se walihana 'ishq hai aur

kisi ko intiha ki dushmani hai kuza-gar se

nai tahzib ka kaDwa dhuan phaila hua hai

hawa miTTi ki KHushbu mangti hai kuza-gar se

tumhein miTTi se sharf-e-ham-kalami ka pata hai

mera matlab kabhi koi baat ki hai kuza-gar se

kisi dewi ne kuza-gar ki peshani ko chuma

koi dewi bahut sharma rahi hai kuza-gar se

ye barqi qumqumon ki raushni hairan-kun hai

magar bazar mein jo raushni hai kuza-gar se

suna hai main ne mallahon se qissa paniyon ka

kahani apni miTTi ki suni hai kuza-gar se

tumhaare pas hai hi kya jise duniya sarahe

tumhaari kaun-si 'adat bhali hai kuza-gar se